Біялогія. 10 клас

Постэмбрыянальны этап антагенезу чалавека — перыяд развіцця чалавека ад нараджэння да моманту смерці.

Існуюць розныя сістэмы ўзроставай перыядызацыі дадзенага этапу антагенезу, якія засноўваюцца на розных крытэрыях фізічнага і псіхічнага развіцця чалавека. Узроставая перыядызацыя ў медыцыне абапіраецца на адпаведныя ўзросту анатамічныя і фізіялагічныя асаблівасці арганізма і вылучае ўзроставыя перыяды ў дзяцей і дарослых. Паводле класіфікацыі Сусветнай арганізацыі аховы здароўя (СААЗ), распрацаванай на Міжнародным з’ездзе ў 1965 г., прынята вылучаць наступныя ўзроставыя перыяды постэмбрыянальнага этапу антагенезу, якія паказаны ў табліцы.

Табліца. Узроставыя перыяды постэмбрыянальнага этапу антагенезу чалавека (паводле класіфікацыі СААЗ)

Узроставы перыяд	Узроставы інтэрвал
Дзеці
Перыяд нованароджанасці	ад 1 да 10 дзён
Грудны ўзрост	ад 10 дзён да 1 года
Ранняе дзяцінства	ад 1 да 3 гадоў
Першае дзяцінства	ад 4 да 7 гадоў
Другое дзяцінства	ад 8 да 12 гадоў (муж.); ад 8 да 11 гадоў (жан.)
Падлеткавы ўзрост	ад 13 да 16 гадоў (муж.); ад 12 да 15 гадоў (жан.)
Дарослыя
Юнацкі ўзрост	ад 17 да 21 года (муж.); ад 16 да 20 гадоў (жан.)
Сталы ўзрост	ад 22 да 60 гадоў (муж.); ад 21 да 55 гадоў (жан.)
Пажылы  ўзрост	ад 61 да 75 гадоў (муж.); ад 56 да 75 гадоў (жан.)
Старэчы ўзрост	ад 76 да 90 гадоў
Доўгажыхары	старэйшыя за 90 гадоў

 

Паміж асобнымі ўзроставымі перыядамі няма строгай мяжы, і рэальная працягласць кожнага перыяду залежыць ад індывідуальных асаблівасцей чалавека, краіны пражывання, эканамічнай і экалагічнай сітуацый, менталітэту і іншых фактараў.