§ 11. Праецыраванне формы прадмета. Прамавугольнае праецыраванне на адну плоскасць праекцый

  • Успомніце з курса фізікі, як атрымліваецца цень ад прадмета. У чым заключаецца метад Монжа? Чаму цень мае большыя памеры, чым сам прадмет?
  • Вы даведаецеся: што такое праецыраванне, якія яго віды, якім чынам выконваецца праецыраванне прадмета.
  • Вы навучыцеся: выконваць праецыраванне прадмета на адну плоскасць праекцый.

Уступ

У аснову пабудовы графічных відарысаў на чарцяжах пакладзены метад праецыравання. Ён заключаецца ў тым, што відарыс прадмета на плоскасці атрымліваюць з дапамогай праецыруючых праменяў. Праецыраванне нагадвае ўтварэнне ценю аб’екта (рыс. 38). Пры асвятленні сонечнымі праменямі (ці штучным святлом, напрыклад ліхтаром) любы аб’ект адкідае цень, падобны да абрысаў самога прадмета.

Праецыраванне — працэс атрымання відарыса прадметаў на плоскасці з дапамогай праецыруючых праменяў.