Біялогія. 11 клас

Малочнакіслае браджэнне працякае ў два этапы, прычым першы этап фактычна ўяўляе сабой гліколіз (мал. 21-1.1). Малекула глюкозы расшчапляецца і акісляецца з утварэннем 2 малекул ПВК і *2 малекул НАД∙Н+Н⁺.* Сумарны энергетычны выхад гэтага працэсу, як вы ведаеце, складае 2 малекулы АТФ:

*1. C₆H₁₂O₆ + 2НАД⁺ + 2АДФ + 2H₃PO₄ → 2C₃H₄O₃ + 2НАД∙Н+Н⁺ + 2АТФ.

На другім этапе ПВК аднаўляецца за кошт НАД∙Н+Н⁺ до малочнай кіслаты (С₃Н₆О₃), АТФ пры гэтым не сінтэзуецца:

2. 2С₃Н₄О₃ + 2НАД∙Н+Н⁺ → 2С₃Н₆О₃ + 2НАД⁺.*

*падсумаваўшы прыведзеныя ўраўненні і выключыўшы НАД, які на першым этапе аднаўляецца, а на другім зноў акісляецца, атрымліваем агульнае ўраўненне малочнакіслага браджэння:

С₆Н₁₂О₆ + 2АДФ + 2Н₃РО₄ → 2С₃Н₆О₃ + 2АТФ.

Гэты від браджэння ажыццяўляюць малочнакіслыя бактэрыі. Акрамя таго, малочнакіслае браджэнне адбываецца ў мышачных валокнах чалавека і жывёл ва ўмовах недахопу кіслароду. Назапашванне малочнай кіслаты з’яўляецца адной з прычын развіцця стомленасці мышцаў.