§ 5. Асноўныя якасці культуры маўлення. Правілы маўленчых паводзін. Маўленчы этыкет
Практыкаванне № 44
Дапоўніце сказы, карыстаючыся словазлучэннямі для даведкі.
1. ... вызначаюць аднастайнае вымаўленне гукаў і іх спалучэнняў у словах. 2. ... прадугледжваюць правільную пастаноўку націску. 3. ... акрэсліваюць правілы перадачы на пісьме вуснага маўлення (узаконьваюцца ўрадавымі пастановамі). 4. ... патрабуюць правільнага ўжывання слоў ва ўласцівых ім значэннях, засведчаных слоўнікамі, правільнага сэнсавага спалучэння слоў. 5. ... вызначаюць ужыванне форм слоў. 6. ... вызначаюць асаблівасці спалучэнняў слоў у словазлучэннях і сказах. 7. ... забяспечваюць правільнае выкарыстанне моўных сродкаў у адпаведнасці са стылем маўлення, зместам, формай і мэтай паведамлення, характарам зносін. 8. ... патрабуюць правільнай расстаноўкі знакаў прыпынку.
Д л я д а в е д к і: пунктуацыйныя нормы, марфалагічныя нормы, арфаэпічныя нормы, сінтаксічныя нормы, акцэнталагічныя нормы, арфаграфічныя нормы, стылістычныя нормы, лексічныя нормы.
• Запішыце азначэнні, пабудаваныя як просты ўскладнены сказ. Зрабіце іх сінтаксічны разбор.
Раскажыце, у якіх слоўніках, даведніках зафіксаваны арфаэпічныя, акцэнталагічныя, арфаграфічныя, лексічныя і марфалагічныя нормы сучаснай беларускай літаратурнай мовы.