*§ 55—1. Экалагічныя праблемы лесу
Значэнне лесу
Значэнне лесу ў жыцці чалавека мае экалагічны, сацыяльны і эканамічны складальнікі. Лясы жыццёва важныя як для людзей, так і для планеты.
Іх экалагічная роля заключаецца ў забеспячэнні чыстым паветрам і вадой, захаванні глебы і водных рэсурсаў, змякчэнні наступстваў змянення клімату. Лясныя экасістэмы ўзбагачаюць атмасферу кіслародам, таму іх па праву называюць зялёнымі лёгкімі планеты. Лясы служаць месцам росту і жыцця больш за відаў, якія складаюць біяразнастайнасць, і выконваюць найважнейшыя функцыі ў біялагічным і геалагічным кругаваротах рэчываў.
Эканамічная роля лесу заключаецца ў выкарыстанні лясных рэсурсаў у гаспадарчай дзейнасці. Лясы з’яўляюцца крыніцай харчавання, лекаў і паліва. З драўніны вырабляюць будаўнічыя матэрыялы, паперу, мэблю, драўнянае паліва. Ігліца і кара дрэў служаць матэрыялам шмат для якіх галін хімічнай прамысловасці.
Сацыяльная роля лесу заключаецца ў тым, што ён з’яўляецца месцам адпачынку і аздараўлення людзей, крыніцай натхнення для паэтаў і мастакоў.