Біялогія. 10 клас

    Ключавыя пытанні

1. Вызначыце, якія групы асобін з прыведзеных прыкладаў можна назваць папуляцыямі: а) хмызнякі на ўзлеску; б) бярозы ў бярозавым гаі; в) вінаградныя слімакі на садовым участку; г) вадаплаўныя птушкі на Браслаўскіх азёрах; д) асобіны люстранога карпа ў рыбаводнай сажалцы. Абгрунтуйце ваш выбар.
2. Ад чаго залежаць верхняя і ніжняя межы колькасці папуляцыі? Што адбудзецца з папуляцыяй, калі яе колькасць выйдзе за гэтыя межы? Якія меры трэба прыняць, каб гэтага не адбылося?
3. Колькі відаў і колькі папуляцый можна налічыць у наступных спалучэннях асобін: мышы палявыя на пшанічным полі і мышы лясныя ў мяшаным лесе; расліны рабіны звычайнай у лесе і ў парку; расліны сасны звычайнай у цэнтры лесу і на яго ўскраіне; расліны яліны еўрапейскай у хвойным лесе і сасны звычайнай у мяшаным лесе?

     Складаныя пытанні

1. Зімой, калі вадаёмы пакрываюцца лёдам, зайцы, што жывуць на розных берагах ракі, сустракаюцца і скрыжоўваюцца. Як можна назваць групы зайцоў з розных берагоў: дзве папуляцыі двух відаў, дзве папуляцыі аднаго віду ці дзве групы адной папуляцыі?
2. У лесе на плошчы 200 га жыве папуляцыя зайцоў колькасцю 280 асобін. Чаму будзе роўна сярэдняя і экалагічная шчыльнасць папуляцыі зайцоў да канца другога года, калі штогод гіне прыкладна 60 асобін, а нараджаецца 140? Забалочаная частка лесу складае 10 % тэрыторыі.

Індывідуальнае дамашняе заданне. У найбліжэйшым парку ці лясным масіве закладзіце пробныя пляцоўкі плошчай 10 м х 10 м у розных месцах, каб была максімальна ахоплена ўся тэрыторыя, якая даследуецца. Падлічыце колькасць дрэў дамінантнага віду на кожнай пляцоўцы, разлічыце іх экалагічную шчыльнасць на кожнай пляцоўцы і вызначыце сярэднюю шчыльнасць на 1 га. Параўнайце атрыманыя даныя і вызначыце — мэтазгодная ці не адзнака гэтых двух паказчыкаў, ці дастаткова аднаго з іх, каб атрымаць уяўленне пра шчыльнасць дадзенай папуляцыі.