Біялогія. 10 клас

    Ключавыя пытанні

1. Які кампанент біяцэнозу адыгрывае галоўную ролю ў фарміраванні вертыкальнай структуры біяцэнозу?
2. У якім ярусе ляснога біяцэнозу жывуць дажджавыя чэрві? Якая іх роля ва ўтварэнні глебы?
3. З прыведзенага пераліку раслін выберыце прадстаўнікоў яруса II ліставога лесу: бузіна, дуб, папараць арляк, ліпа, чаромха, ясень, бяроза, рабіна, ляшчына, яблыня дзікая, крушына, ажыны, чарніцы.

    Складаныя пытанні

1. Устанавіце адпаведнасць паміж надземнымі ярусамі ліставога лесу і відамі жывёл, якія ўваходзяць у іх склад.
Ярусы: I; II; III; IV; V.
Віды: а) заяц, кабан, лісіца, воўк; б) кляшчы, жужалі, мнаганожкі, чмялі; в) птушкі, жукі караеды, вусачы, златкі; г) лістагрызучыя насякомыя; д) лось, казуля, зубр, алень высакародны.
2. Устанавіце прычынна-выніковыя сувязі паміж экалагічнымі фактарамі біятопу і відавым складам раслінных ярусаў біяцэнозу. Зыходзячы з гэтага, растлумачце прычыну адрознення відавога складу раслін у розных ярусах.

*Індывідуальнае дамашняе заданне. Прааналізуйце вертыкальную прасторавую структуру біяцэнозаў ліставога і хвойнага лясоў. У чым заключаецца адрозненне? Растлумачце прычыну з экалагічнага пункту гледжання.