Біялогія. 10 клас

Расліна

Сімптомы атручэння

Цыкута ядавітая 
(Сicuta virosa)

Карэнішчы і карані расліны смяротна ядавітыя. Пасля ўжывання ў ежу сцёблаў з лістамі назіраюцца галаўны боль, млоснасць, ваніты, болі ў жываце. Лятальны канец магчымы ад спынення дыхання на фоне вострай сардэчнай недастатковасці

Балігалоў рабы
(Conium maculatum)

Пасля ўжывання ў ежу сцёблаў з лістамі назіраюцца млоснасць, слінацячэнне, галавакружэнне, парушэнне глытання, маўлення, паблядненне  і страта адчувальнасці скуры, прыгнечанне цэнтральнай нервовай сістэмы, параліч, расшырэнне зрэнак і адсутнасць рэакцыі на святло

Дурнап’ян звычайны
(Datura stramonium)

Пры ўдыханні лятучых рэчываў кветак назіраюцца трызненне, галюцынацыі, якія могуць прывесці да псіхічнага расстройства. Сухасць у роце, расстройства глытання, крывавая дыярэя, парушэнне функцый ЦНС з’яўляюцца пры ўжыванні ў ежу любой часткі расліны. Цяжкае атручэнне можа прывесці да лятальнага канца

Блёкат чорны 
(Hyoscyamus niger)

Усе часткі расліны ядавітыя. Назіраюцца сутаргі са стратай прытомнасці, павышаецца тэмпература. Магчымы лятальны канец. Пры паяданні алеістага насення назіраецца востры псіхоз з галюцынацыямі

Казялец ядавіты
(Ranunculus sceleratus)

Пры пападанні соку расліны на скуру назіраецца хімічны апёк, а таксама пякота, рэзкі боль у вачах, пачуццё іншароднага цела, слёзацячэнне, часовая страта зроку. Пры высокай канцэнтрацыі яду ў крыві — трэмар, сутаргі, памутненне свядомасці. Пры ўдыханні лятучых рэчываў кветак — пяршэнне і пякота ў насаглотцы, моцны насмарк, чханне

Ландыш майскі 
(Convallaria majalis)

Пры паглынанні пладоў (чырвоных ягад) назіраюцца бледнасць скуры, моцная млоснасць, болі ў жываце, неўтаймаваныя ваніты, рэзкая слабасць, санлівасць, галюцынацыі, парушэнне свядомасці. Пры моцным атручэнні можа адбыцца спыненне сэрца

Воўчае лыка 
(Daphne meserium)

Пры ўжыванні ўсіх частак расліны назіраюцца дыярэя, ваніты, гарачка, моцнае раздражненне скуры, якое можа прывесці да некрозу. Пры ўжыванні ягад расліны ўзнікае цяжкае пашкоджанне страўніка, кішэчніка і нырак, зніжаецца  згусальнасць крыві, што можа прывесці да лятальнай кровастраты

Бузіна чырвоная
(Sambucus racemosa)

Пасля паглынання пладоў назіраюцца галавакружэнне, дэзарыентацыя ў прасторы, млоснасць, ваніты, гарката ў роце, пяршэнне ў горле, болі ў жываце, дыярэя, павышанае слінавыдзяленне, пачашчэнне пульсу. Пры атручэнні тканкі арганізма адчуваюць кіслароднае галаданне

Баршчэўнік Сасноўскага
(Heracleum sosnowskyi)

Сок і раса расліны выклікаюць апёкі скуры аж да III ступені. Удыханне пылку ці эфірных масел выклікае распуханне гартані, удушша і можа прывесці да лятальнага канца. Сок ці пылок пры пападанні ў вочы здольныя выклікаць слепату