*§ 55—1. Экалагічныя праблемы лесу
- Успомніце, якія фактары належаць да антрапагенных.
- Як вы думаеце? Ці існуе сувязь паміж экалагічным станам прыроды, здароўем чалавека і ступенню ўплыву антрапагенных фактараў на прыроду?
- Вы даведаецеся, якія экалагічныя праблемы, звязаныя з дзейнасцю чалавека, характэрны для лесу.
Прэамбула
Экалагічныя праблемы сучаснага свету ўяўляюць сур’ёзную небяспеку для планеты Зямля. Каля 10—15 % паверхні сушы разарана, 25 % уяўляюць сабой пашы. Калі да гэтага дабавіць 3—5 % паверхні, занятай транспартнай сеткай, прамысловасцю, будынкамі і збудаваннямі, 1—2 % тэрыторыі Зямлі, пашкоджанай распрацоўкамі карысных выкапняў, то выявіцца, што амаль палова паверхні сушы відазменена чалавекам. Нерацыянальная дзейнасць чалавека прыносіць сур’ёзную шкоду прыродным экасістэмам. Яна ўжо прывяла да збяднення глеб і рэсурсаў прэсных вод, скарачэння плошчы лясоў, знікнення відаў жывёл і раслін, глабальнага забруджвання навакольнага асяроддзя, парніковага эфекту і змянення клімату. Узмацненне гэтых глабальных праблем сігналізуе пра сур’ёзны экалагічны крызіс.