*§ 50—1. Умовы існавання жывых арганізмаў у біясферы
- Успомніце азначэнне паняцця «ўмовы існавання».
- Як вы думаеце? Ці існавала б жыццё на Зямлі, калі б не было зялёных раслін?
- Вы даведаецеся пра асноўныя ўмовы, неабходныя для існавання жывых арганізмаў у біясферы.
Значэнне і выкарыстанне светлавой энергіі
Крыніцай энергіі, неабходнай для існавання жыцця на Зямлі, як вы ўжо ведаеце, з’яўляецца Сонца. Улоўліванне энергіі Сонца ажыццяўляецца раслінамі, якія змяшчаюць хларафіл, у працэсе фотасінтэзу. У выніку сонечная энергія пераўтвараецца ў энергію хімічных сувязей сінтэзаваных арганічных рэчываў. У далейшым гэта энергія выкарыстоўваецца для жыццядзейнасці як саміх раслін, так і іншых арганізмаў, якія выкарыстоўваюць расліны ў якасці ежы.