*§ 48—1. Паняцце біёма. Біём тундры
- Успомніце, па якіх экалагічных фактарах адрозніваюцца прыродныя экасістэмы, размешчаныя ў розных кліматычных зонах.
- Як вы думаеце? Чаму ў тундры для раслін характэрна нізкаросласць і чаму там адсутнічаюць земнаводныя і паўзуны?
- Вы даведаецеся пра існаванне буйных біялагічных сістэм — біёмаў, пазнаёміцеся з асаблівасцямі ўмоў асяроддзя, прадстаўнікамі прадуцэнтаў і кансументаў біёма тундры.
Біём тундры. Геаграфічнае становішча
Тундра характарызуецца панаваннем бязлесых экасістэм, у якіх вядучую ролю адыгрываюць нізкарослыя жыццёвыя формы раслін.
Тундра займае самае паўночнае становішча на мацерыках і астравах Паўночнага паўшар’я, таму яна часта называецца арктычнай тундрай. Яна размешчана паміж лясамі на поўдні і палярнымі льдамі на поўначы. У высокіх шыротах Паўднёвага паўшар’я таксама маюцца падобныя да тундры экасістэмы, але яны не ўтвараюць адзіную зону, паколькі знаходзяцца пераважна на блізкіх да Антарктыды астравах. Высока ў горах вышэй за межы лесу сустракаюцца экалагічна падобныя да тундры раёны, якія называюцца альпійскай тундрай.
