*§ 41—2. Каменсалізм, протакааперацыя і мутуалізм — тыпы станоўчых біятычных узаемаадносін
- Успомніце, якія тыпы ўзаемаадносін прыводзяць да зніжэння колькасці абодвух ці аднаго з відаў, якія ўзаемадзейнічаюць. Чаму іх называюць рэгулюючымі ўзаемаадносінамі?
- Як вы думаеце? Ці існуе ў біяцэнозе ўзаемадапамога паміж рознымі відамі? Ці могуць віды быць карысныя адзін аднаму?
- Вы даведаецеся пра тыпы ўзаемаадносін, узаемавыгадных ці выгадных аднаму з відаў, якія ўзаемадзейнічаюць, а таксама пра іх ролю ў біяцэнозе.
Прэамбула
У папярэднім параграфе вы пазнаёміліся з узаемаадносінамі паміж відамі ў біяцэнозе, якія прыводзяць да зніжэння іх колькасці. Тым не менш у сфармаваных біяцэнозах колькасць відаў з’яўляецца адносна пастаяннай. Такім чынам, існуюць узаемаадносіны, якія спрыяюць павышэнню колькасці відаў, што ўзаемадзейнічаюць. Як вы ведаеце, узаемаадносіны, пры якіх віды карысныя адзін аднаму, прычым у адных выпадках гэта карысць узаемная, а ў іншых аднабаковая, умоўна называюцца станоўчымі. Як бачна з табліцы (*§ 41—1), да іх належаць каменсалізм, протакааперацыя, мутуалізм. Разгледзім іх адметныя асаблівасці і ролю ў біяцэнозе.