*§ 29—3. Спосабы бясполага размнажэння мнагаклетачных арганізмаў
- Успомніце, якія спосабы бясполага размнажэння сустракаюцца ў аднаклетачных эўкарыёт.
- Як вы думаеце? Чым адрозніваюцца аднайменныя спосабы размнажэння (пачкаванне, спораўтварэнне) мнагаклетачных і аднаклетачных арганізмаў?
- Вы даведаецеся пра розныя спосабы бясполага размнажэння мнагаклетачных, іх асаблівасці ў параўнанні з размнажэннем аднаклетачных арганізмаў.
Вегетатыўнае размнажэнне
Такі спосаб размнажэння характэрны для раслін. Пры вегетатыўным размнажэнні даччыны арганізм фарміруецца за кошт вегетатыўнага органа ці яго відазмянення (гл. мал. у § 1). Вегетатыўнае размнажэнне ў раслін можа ажыццяўляцца з дапамогай сцябла (кактусы, эладэя), ліста (фіялка, бягонія), каранёвых чаранкоў (маліны, сліва, вішня). У некаторых раслін для размнажэння выкарыстоўваюцца відазмененыя парасткі: цыбуліны (цыбуля, часнок, цюльпан, нарцыс); карэнішчы (пырнік, ландыш); вусы (суніцы); клубні (бульба); каранёвыя клубні (вяргіня). Для размнажэння культурных раслін чалавек ужывае такія спосабы вегетатыўнага размнажэння, як атожылкі і чаранкі, дзяленне куста (парэчкі, агрэст, маліны). У садаводстве часта ўжываецца прышчэпка, калі хочуць злучыць каштоўныя спажывецкія якасці гатунку расліны, якая прышчэпліваецца (прышчэпак), з непатрабавальнасцю расліны, на якую праводзіцца прышчэпка (прышчэпа).