§ 26. Сертыфікацыя харчовых прадуктаў у Беларусі
- Успомніце, якімі шляхамі шкодныя для здароўя рэчывы трапляюць у арганізм чачалавека.
- Як вы думаеце? Чым абумоўлена неабходнасць стварэння міжнароднага харчовага заканадаўства?
- Вы даведаецеся пра парадак сертыфікацыі харчовай прадукцыі.
Тэхнічныя рэгламенты, тэхнічныя ўмовы, нацыянальныя стандарты і ДАСТы
Тэхнічныя рэгламенты вызначаюць абавязковыя тэхнічныя патрабаванні, звязаныя з бяспекай прадукцыі і яе выкарыстаннем. У іх адлюстраваны мікрабіялагічныя паказчыкі, утрыманне таксічных рэчываў, радыенуклідаў.
У тэхнічных умовах, або стандартах, вызначаюцца фізіка-хімічныя (утрыманне вільгаці, бялкоў, тлушчу, кіслотнасць) і арганалептычныя (смак, колер, пах) паказчыкі якасці харчовых прадуктаў.
Стандарты, якія выкарыстоўваюцца ў Беларусі ў якасці дзяржаўных, абазначаюцца «СТБ» — гэта нацыянальныя стандарты Рэспублікі Беларусь, зацверджаныя Дзяржаўным камітэтам па стандартызацыі. Таксама ў Рэспубліцы Беларусь дзейнічаюць ДАСТы — міждзяржаўныя стандарты, прынятыя Еўразійскім саветам па стандартызацыі, метралогіі і сертыфікацыі, членамі якога з’яўляюцца краіны, што ўваходзяць у Садружнасць Незалежных Дзяржаў.