§ 9. Паняцце пра асяроддзе жыцця. Воднае асяроддзе жыцця
- Успомніце, што абазначаюць паняцці «асяроддзе пражывання» і «навакольнае асяроддзе».
- Як вы думаеце? Якія экалагічныя фактары з’яўляюцца лімітуючымі ў водным асяроддзі?
- Вы даведаецеся пра паняцце «асяроддзе жыцця», пра асаблівасці тэмпературнага, светлавога, газавага і салявога рэжымаў у водным асяроддзі жыцця.
Воднае асяроддзе
Воднае асяроддзе займае прыблізна 71 % паверхні зямнога шара. Вада як асноўны кампанент воднага асяроддзя мае шэраг спецыфічных уласцівасцей: вялікая шчыльнасць, павелічэнне ціску з глыбінёй, высокая ўдзельная цеплаёмістасць, моцнае паглынанне сонечных прамянёў, адносна малое ўтрыманне кіслароду. Асобныя вадаёмы адрозніваюцца па салявым рэжыме, наяўнасці плыней і іншых параметрах.
Усе расліны воднага асяроддзя называюцца гідрафітамі (ад грэч. hýdōr — вада, phýtōn — расліна). Жывёльныя арганізмы, якія жывуць у водным асяроддзі, называюцца гідрабіёнтамі (ад грэч. hýdōr — вада, bíos — жыццё).