Беларуская мова. 11 клас

Прачытайце тэкст. У гонар юбілею якой падзеі быў створаны парк Пісьменнікаў? Чаму ён быў закладзены побач з Нацыянальнай бібліятэкай Беларусі?

Парк Пісьменнікаў

У Мінску ёсць унікальнае месца, якога няма больш ні ў адным горадзе свету, — парк Пісьменнікаў. Ён з’явіўся ў лістападзе 2017 года побач з Нацыянальнай бібліятэкай Беларусі, і яго стварэнне стала знакавай падзеяй у гонар 500-годдзя беларускага кнігадрукавання^сл.
Беларускія пісьменнікі, бібліятэкары, супрацоўнікі музеяў і выдавецтваў прынялі ўдзел у высакароднай справе — пасадцы дрэў. Парк упрыгожылі дуб, рабіна, ясень, клён, хвоя, а маладзенькія яблынькі было даверана высадзіць маладым літаратарам.
Дзякуючы ініцыятыве Саюза пісьменнікаў Беларусі ў Мінску з’явіўся своеасаблівы цэнтр сустрэч аматараў кнігі. Стварэнне парку Пісьменнікаў сведчыць пра духоўнасць беларусаў, разуменне імі ролі кнігі, значнасці чытання, якая ўсё больш узрастае ў сучасным свеце.
Пасаджаныя ў парку Пісьменнікаў дрэвы ўжо зашумелі сваёй лістотай. Тут расце «жывая» кніга, а таксама ўстаноўлены камень у гонар стварэння парку.
Саюз пісьменнікаў Беларусі плануе ўстанавіць у парку Пісьменнікаў скульптуру, прысвечаную «чалавеку, які чытае». Падобныя скульптуры ўпрыгожваюць розныя гарады, і настаў час беларускай сталіцы займець свой варыянт такога помніка (Паводле А. Стэльмах).

Чаму аўтар называе стварэнне парку Пісьменнікаў знакавай падзеяй?
Выпішыце з тэксту складаназлучаныя сказы, падкрэсліце граматычныя асновы. Назавіце сродкі сувязі граматычных частак. Вызначце сэнсавыя адносіны паміж часткамі. Пабудуйце схемы сказаў.
•Знайдзіце ў тэксце запазычаныя словы з арфаграмамі — спалучэннямі галосных. Растлумачце іх правапіс.
Выкажыце свае прапановы па добраўпарадкаванні тэрыторыі парку Пісьменнікаў (напрыклад, алеі ў гонар пісьменнікаў, кампазіцыі, прысвечаныя літаратурным героям, і інш.). Раскажыце, якой вам уяўляецца скульптура, прысвечаная «чалавеку, які чытае».

Назоўнік парк у форме роднага склону адзіночнага ліку ўжываецца з канчаткам -у, калі мае значэнні ‘зялёныя насаджэнні’ (стварэнне парку Пісьменнікаў), ‘сукупнасць транспартых сродкаў’ (трактар з парку сельскагаспадарчых машын); з канчаткам -а, калі мае значэнне ‘месца стаянкі транспарту’ (пад’ехаць да тралейбуснага парка).