*§ 7-1. Устойлівае развіццё — мадэль развіцця ХХI ст.
Напрамкі ўстойлівага развіцця.
Устойлівае развіццё магчыма пры раўнавазе трох асноўных складнікаў:
- • эканамічны рост;
- • сацыяльная адказнасць;
- • экалагічны баланс.
Новае разуменне эканамічнага росту постіндустрыяльнай эканомікі заснавана на ўкараненні рэсурсазберагальных тэхналогій, выкарыстанні экалагічна чыстай вытворчасці і правільнай утылізацыі адходаў.
Са студзеня 2021 г. у Беларусі забаронена выкарыстоўваць пластыкавы посуд на аб’ектах агульнага харчавання. З выкарыстання павінны знікнуць трубачкі (саломінкі), палачкі для размешвання напояў, пластыкавыя шклянкі, кубкі, талеркі і іншая пластыкавая ўпакоўка для прадукцыі агульнага харчавання і харчовых прадуктаў. Як вы думаеце, якія сэрвісы могуць атрымаць развіццё ў нашай краіне ў сувязі з гэтым?
Якія кантэйнеры для раздзельнага збору адходаў вам вядомы? Як пераканаць людзей у важнасці раздзельнага збору бытавых адходаў? Прывядзіце некалькі аргументаў.
У прыкладным плане мадэль устойлівага развіцця — гэта спосаб арганізацыі і функцыянавання грамадства, дзяржавы, эканомікі на прынцыпах устойлівасці, найважнейшымі з якіх з’яўляюцца:
- • чалавек — мэта прагрэсу;
- • узровень чалавечага развіцця — мера сталасці грамадства, дзяржавы, яго сацыяльна-эканамічнай палітыкі;
- • павышэнне ўзроўню дабрабыту народа, пераадоленне беднасці, удасканаленне структур вытворчасці і спажывання;
- • прыярытэтнае развіццё сістэм аховы здароўя, адукацыі, культуры як найважнейшых сфер жыццядзейнасці грамадства, фактараў доўгатэрміновага росту працоўнай актыўнасці і творчага развіцця асобы;
- • рацыянальнае прыродакарыстанне, захаванне і паляпшэнне навакольнага прыроднага асяроддзя;
- • пераход на рэсурсазберагальны інавацыйны тып развіцця эканомікі ў межах гаспадарчай ёмістасці экасістэм;
- • удасканаленне сістэмы кіравання, механізмаў прыняцця і рэалізацыі кіраўніцкіх рашэнняў;
- • развіццё міжнароднага супрацоўніцтва і сацыяльнага партнёрства з мэтай захавання, аховы і аднаўлення экасістэм;
- • павышэнне ўзроўню каардынацыі і ўзаемадзеяння дзяржавы, прыватнага бізнесу і грамадзянскай супольнасці па рэалізацыі пастаўленых мэт і задач устойлівага развіцця (з Нацыянальнай стратэгіі ўстойлівага развіцця Рэспублікі Беларусь).