§ 43. Асноўныя гіпотэзы паходжання жыцця
Асноўнымі гіпотэзамі ўзнікнення жыцця з’яўляюцца гіпотэзы Боскага стварэння (крэацыянізм), пазаземнага паходжання жыцця і біяхімічныя. Канцэпцыя самаадвольнага зараджэння жывых арганізмаў з аб’ектаў нежывой прыроды на сённяшні дзень абвергнута. У сучасных умовах жыццё можа ўзнікнуць толькі з папярэдняга жыцця. Аднак ва ўмовах старажытнай Зямлі паходжанне жывых арганізмаў у выніку працяглай эвалюцыі хімічных злучэнняў уяўляецца магчымым. У гэтым заключаецца сутнасць каацэрватнай гіпотэзы Апарына — Холдэйна. Паводле яе ў працэсе ўзнікнення жыцця на Зямлі можна вылучыць тры этапы: сінтэз нізкамалекулярных арганічных рэчываў з неарганічных, утварэнне біяпалімераў і фарміраванне протабіёнтаў — першых жывых арганізмаў.