§ 13. Колькасць цеплаты
Удзельная цеплата параўтварэння. Фізічную велічыню, лікава роўную колькасці цеплаты, якую трэба перадаць вадкасці масай 1 кг, што знаходзіцца пры тэмпературы кіпення, для ператварэння яе пры пастаяннай тэмпературы ў пару, называюць удзельнай цеплатой параўтварэння L. Адзінкай вымярэння гэтай велічыні з’яўляецца джоўль, падзелены на кілаграм . Колькасць цеплаты, неабходную для ператварэння вадкасці масай m, папярэдне нагрэтай да тэмпературы кіпення, у пару, вызначаюць па формуле Qп = Lm. Кандэнсацыя пары суправаджаецца выдзяленнем колькасці цеплаты Qк = –Lm.
У ходзе эксперымента быў пабудаваны графік залежнасці тэмпературы рэчыва ад абсалютнай велічыні выдзеленай ім у працэсе цеплаабмену колькасці цеплаты (мал. 76). У момант, калі пачаўся адлік часу, у пасудзіне знаходзіўся толькі газ, а яго ціск на працягу ўсяго працэсу заставаўся пастаянным. Якія змены тэмпературы і ўнутранай энергіі рэчыва адлюстраваны на кожным участку графіка?