*§ 50—1. Умовы існавання жывых арганізмаў у біясферы
Забруджвальныя рэчывы і іх значэнне
Негатыўныя наступствы на існаванне жывых арганізмаў мае ўздзеянне забруджвальных рэчываў. У сучасных умовах такіх рэчываў дастаткова вялікая колькасць. Крыніцамі забруджвальных рэчываў з’яўляюцца тэхналагічнае абсталяванне, машыны, механізмы. Да найбольш небяспечных забруджвальных рэчываў належаць канцэрагенныя рэчывы, уздзеянне якіх на арганізм чалавека ці жывёл павялічвае верагоднасць узнікнення злаякасных пухлін (іанізуючае і ультрафіялетавае выпраменьванні, нітраты, нітрыты, фармальдэгід, араматычныя вуглевадароды). Для гэтых рэчываў не існуе ніжніх меж бяспекі і любыя іх колькасці небяспечныя для жывых арганізмаў. Каб захаваць відавую разнастайнасць жывых арганізмаў, неабходна ведаць гранічна дапушчальныя ўзроўні ўтрымання забруджвальных рэчываў, пры якіх магчымая звычайная жыццядзейнасць арганізмаў.
Паўторым галоўнае. Жыццё валодае значным запасам трываласці і ўстойлівасці да ўздзеяння асяроддзя. Жывыя арганізмы могуць існаваць у шырокім дыяпазоне ўмоў асяроддзя. Аднак для існавання жыцця на Зямлі неабходны шэраг умоў. Адной з іх з’яўляецца наяўнасць крыніцы светлавой энергіі. Не менш важнымі ўмовамі з’яўляюцца наяўнасць пэўных канцэнтрацый кіслароду і вуглякіслага газу, патрэбнай колькасці мінеральных рэчываў, дастатковай колькасці вадкай вады, пэўнага інтэрвалу спрыяльных тэмператур і адсутнасць забруджвальных рэчываў, якія па сваіх уласцівасцях і канцэнтрацыі пераўзыходзяць дапушчальныя для жыцця ўзроўні.