*§ 48—2. Біём паўночных хвойных лясоў — тайга
Геаграфічнае становішча
Паўночныя хвойныя лясы — тайга — з’яўляюцца адным з найбуйнейшых лясных біёмаў сушы. Паласа хвойных лясоў размешчана ў высокіх паўночных шыротах паміж 50° і 70° паўночнай шыраты, на поўдзень ад тундры і на поўнач ад лістападных лясоў і стэпаў умеранай зоны. Такія лясы характэрны толькі для Паўночнага паўшар’я. Яны працягнуліся праз усю Паўночную Амерыку і Еўразію.
У Паўднёвым паўшар’і лясы такога тыпу практычна адсутнічаюць, верагодна, таму, што ў зонах з прыгодным кліматам вельмі мала зямель. У горных раёнах такія лясы сустракаюцца вышэй за ўзровень ліставых лясоў.