§ 1. Агульныя ўласцівасці жывых арганізмаў
Клетачная будова
Клетка з’яўляецца структурна-функцыянальнай адзінкай усяго жывога. Клеткі розных арганізмаў маюць падобную будову. Звонку яны пакрыты цытаплазматычнай мембранай, зверху якой можа быць клетачная сценка (расліны, грыбы, некаторыя пратысты, бактэрыі). Змесціва клетак прадстаўлена цытаплазмай, у якой знаходзяцца арганоіды і ядро (у бактэрый — храмасома). Клеткі большасці мнагаклетачных арганізмаў у залежнасці ад функцыі, будовы і паходжання аб’ядноўваюцца ў тканкі і органы.