§ 8-2. CУСВЕТНЫ АКІЯН
Успамінаем. Што такое Сусветны акіян? Якія прыродныя аб’екты вылучаюць у Сусветным акіяне? Як называўся самы старажытны акіян на Зямлі?
Вывучаем, каб ведаць. Навошта трэба ведаць структурныя кампаненты Сусветнага акіяна? Як узаемазвязаны морфаметрычныя і гідралагічныя характарыстыкі Сусветнага акіяна? Для чаго трэба вывучаць прыродныя рэсурсы Сусветнага акіяна?
Асноўныя структурныя кампаненты Сусветнага акіяна. Па сукупнасці ўсіх прыкмет Сусветны акіян падзяляецца на Ціхі, Атлантычны, Індыйскі і Паўночны Ледавіты акіяны. Яны маюць пэўную канфігурацыю, памеры, малюнак берагавой лініі. Для кожнага з іх характэрная ўласная сістэма цячэнняў, прыліваў і адліваў, асаблівы гідралагічны рэжым, рэльеф дна і г. д. Акіяны ўключаюць у сябе больш дробныя часткі: мора, залівы і пралівы.
Папрацуем з атласам. Выкарыстоўваючы карты атласа, назавіце найбуйнейшыя моры, залівы і пралівы ўсіх акіянаў.