§ 17. МІЖНАРОДНАЯ ЭКАНАМІЧНАЯ ІНТЭГРАЦЫЯ
Успамінаем. Чаму краіны ўтвараюць гандлёвыя і эканамічныя саюзы? Якія вядучыя інтэграцыйныя аб’яднанні існуюць у свеце? Якое іх значэнне ў свеце? Якія асноўныя мэты стварэння Еўрапейскага саюза, СНД? |
Для чаго мы гэта вывучаем? Чаму ў цяперашні час паміж краінамі ствараюцца інтэграцыйныя аб’яднанні? Па якой прычыне найбольшая колькасць інтэграцыйных аб’яднанняў узнікае ў краінах, якія развіваюцца? |
Кожная краіна ў выніку эканамічнай інтэграцыі атрымлівае перавагі. Асноўнымі перавагамі ўтварэння паміж краінамі эканамічнага інтэграцыйнага аб'яднання выступаюць:
– больш шырокі доступ да розных рэсурсаў (фінансавых, прыродных, працоўных);
– магчымасць вырабляць і прадаваць тавары і паслугі ў большым аб'ёме ў разліку на больш ёмісты рынак спажывання ўсяго інтэграцыйнага аб'яднання;
– стварэнне для членаў аб'яднання больш выгадных умоў гандлю паміж сабой у параўнанні з іншымі дзяржавамі;
– магчымасць вырашыць сумесна сацыяльныя праблемы (напр., беспрацоўе) за кошт працаўладкавання рабочай сілы ўнутры аб'яднання. У выніку ў краінах адбываецца больш хуткі рост эканамічнага развіцця.
Аднак ад інтэграцыі краіны могуць мець і выдаткі. Напрыклад, у выніку стварэння больш спрыяльных умоў узаемнага гандлю і скасаванне мытных пошлін краіна — удзельніца аб'яднання будзе атрымліваць менш паступленняў у свой бюджэт. Больш рацыянальнае і выгаднае для інтэграцыйнага аб'яднання размяшчэнне вытворчасцей, змяненне спецыялізацыі можа прывесці да скарачэння працоўных месцаў і закрыцця асобных прадпрыемстваў. У цэлым, перавагі эканамічнай інтэграцыі перакрываюць выдаткі.