§ 20-2. ГЕАГРАФІЯ МІНЕРАЛЬНЫХ РЭСУРСАЎ СУСВЕТНАГА АКІЯНА

icon
Успамінаем. Якія асноўныя морфаметрычныя характарыстыкі Сусветнага акіяна? Якія асноўныя гідралагічныя характарыстыкі Сусветнага акіяна? Якімі прыроднымі рэсурсамі валодае Сусветны акіян?
icon
Вывучаем, каб ведаць. Якое значэнне мінеральных рэсурсаў Сусветнага акіяна для чалавецтва? Якія катэгорыі мінеральных рэсурсаў Сусветнага акіяна вылучаюць? Якія акіяны валодаюць найбольшымі запасамі мінеральных рэсурсаў?

Значэнне мінеральных рэсурсаў Сусветнага акіяна для развіцця сусветнай гаспадаркі. Значэнне Сусветнага акіяна для ўсяго свету няўхільна расце. Сучасны этап развіцця чалавецтва характарызуецца пашырэннем эканамічнай і навуковай дзейнасці на кантынентальным шэльфе і дне Сусветнага акіяна, выкарыстаннем іх рэсурснага патэнцыялу ў прамысловай вытворчасці.

iconКлуб знаўцаў-географаў. Успомніце імёны навукоўцаў, якія даследавалі Сусветны акіян, і іх адкрыцці.

Ужо цяпер ВУП умоўнай дзяржавы «Сусветны акіян» набліжаецца да 3 трлн дол. У перспектыве — да 2050 г. — дадзеная адзнака можа павялічыцца ў 2–2,5 раза. Таму асваенне мінеральных рэсурсаў Сусветнага акіяна становіцца найважнейшым напрамкам сусветнай эканомікі.

iconПаразважаем. Чаму паміж дзяржавамі свету ідзе барацьба за асваенне шэльфа Сусветнага акіяна?

Сусветны акіян уяўляе сабой вялізную кладоўку мінеральных багаццяў. Карысныя выкапні ў яго межах заключаны ў двух розных асяроддзях — непасрэдна ў акіянічнай воднай масе як асноўнай частцы гідрасферы і ў зямной кары, што знаходзіцца пад ёй, як частцы літасферы.