ПРАДМОВА

Дарагія сябры!

Раздзел школьнага курса біялогіі, які вывучаецца ў 10-м і 11-м класах, прысвечаны разгляду агульных заканамернасцей жывой прыроды. У гэтым навучальным годзе вы працягнеце знаёмства з найважнейшымі прыроднымі працэсамі і з’явамі, законамі існавання і ўзаемадзеяння біялагічных сістэм рознага ўзроўню арганізацыі.

Вы даведаецеся, як пабудаваны і функцыянуюць клеткі жывых арганізмаў, якія рэчывы ўваходзяць у іх састаў і ў чым заключаецца біялагічная роля гэтых злучэнняў. Вы пазнаёміцеся з няклетачнымі формамі жыцця, пашырыце свае ўяўленні пра працэсы жыццядзейнасці і механізмы іх рэгуляцыі. Таксама вы вывучыце заканамернасці эвалюцыі жывых арганізмаў, іх спадчыннасці і зменлівасці. Атрыманыя веды дапамогуць вам знайсці адказы на многія пытанні пра жывую прыроду, сфарміраваць цэласную навуковую карціну навакольнага свету, спатрэ­бяцца ў штодзённым жыцці. 

Вучэбны дапаможнік уключае восем раздзелаў, падзеленых на параграфы. Кожны раздзел пачынаецца з кароткага ўступу і заканчваецца рубрыкай ПАДВЯДЗЁМ ВЫНІКІ, якая змяшчае асноўныя вынікі па дадзенай тэме.

Тэкст параграфаў уключае асноўны і дадатковы матэрыял. Самыя важныя тэрміны і паняцці вылучаны тлустым шрыфтам, іншыя адзначаны курсівам. 

Дадатковы матэрыял адзначаны вертыкальнай лініяй. Ён дазваляе пашырыць, паглыбіць ці канкрэтызаваць веды, азнаёміцца з цікавымі біялагічнымі фактамі.

Матэрыял, які вывучаецца толькі на прасунутым узроўні, * вылучаецца зорачкамі *.

У канцы кожнага параграфа на каляровым фоне з піктаграмай прыводзяцца кароткія вынікі.

Гэта галоўная інфармацыя па вывучаемым матэрыяле, на якую трэба звярнуць асаблівую ўвагу

Пасля кожнага параграфа прыводзяцца пытанні і заданні, абазначаныя піктаграмай.

Некаторыя з іх адзначаны зорачкай (*). Каб паспяхова справіцца з такімі пытаннямі і заданнямі, трэба асабліва пастарацца і ў шэрагу выпадкаў выкарыстаць веды, атрыманыя пры вывучэнні папярэдніх раздзелаў біялогіі ці іншых прадметаў

Некаторыя параграфы змяшчаюць рубрыку «Мае біялагічныя даследаванні», якая абазначана піктаграмай. У ёй прапануюцца заданні,

якія дапамогуць вам пашырыць кругагляд і замацаваць матэрыял, які вывучаецца, на практыцы. Многія з гэтых заданняў вы змо­жаце зрабіць дома. Для выканання некаторых з іх спатрэбіцца спе­цыяльнае абсталяванне (напрыклад, мікраскоп) ці рэактывы, работа з якімі патрабуе няў­хільнага выканання правілаў тэхнікі бяспекі. Такія заданні рэкамендуецца рабіць у школе пад кіраўніцтвам настаўніка.
Важна адзначыць, што выкананне заданняў рубрыкі «Мае біялагічныя даследаванні» не но­сіць абавязковага характару.

У канцы вучэбнага дапаможніка прыведзены прыклады рашэння задач па розных тэмах, а таксама слоўнік асноўных тэрмінаў і паняццяў.
Жадаем вам поспехаў у вывучэнні біялогіі!

Аўтары

Апошняе змяненне: Панядзелак 21 Чэрвень 2021 12:45