§ 9. УПЛЫЎ ДЗЕЙНАСЦІ ЧАЛАВЕКА НА ВОДЫ СУШЫ

Дэфіцыт і дэградацыя вод сушы. У зоне дэфіцыту водных рэсурсаў знаходзіцца вялікая частка сушы: 20 % тэрыторыі Еўропы, 50 % Азіі, амаль уся Аўстралія, паўднёва-заходнія раёны Паўночнай Амерыкі (30 %), каля 20 % Паўднёвай Амерыкі. Да залішне ўвільготненых належаць тэрыторыі, размешчаныя ў экватарыяльным, субэкватарыяльным і субпалярным паясах, а таксама многія раёны ўмеранага пояса. Тут сканцэнтраваны амаль усе найбуйнейшыя прэсныя азёры і найбольш паўнаводныя рэкі свету.

iconКлуб географаў-знаўцаў. Каб ліквідаваць дэфіцыт вільгаці ў Сахары (2000 мм), якая займае плошчу 7 млн км2, неабходна 14 000 км3/год, г. зн. каля 1/3 усяго рачнога сцёку свету.

iconСвет і Беларусь. Беларусь мае значныя рэсурсы прэсных падземных вод. Разведана больш за 250 радовішчаў, на базе якіх ажыццяўляецца цэнтралізаванае водазабеспячэнне больш за 60 гарадоў, водазабеспячэнне многіх іншых населеных пунктаў і аб’ектаў сельскагаспадарчай вытворчасці. Сумарныя эксплуатацыйныя рэсурсы прэсных падземных вод краіны складаюць каля 50 млн м3/сут. Вядуцца актыўныя работы па барацьбе з тэхнагенным забруджваннем падземных вод.