§ 21. Прыродныя крыніцы вуглевадародаў і іх выкарыстанне
Прыродны газ
Асноўным кампанентам прыроднага газу з’яўляецца метан. Акрамя метану ў прыродным газе прысутнічаюць этан, прапан і бутаны. Звычайна чым вышэйшая малекулярная маса вуглевадароду, тым меншае яго змяшчэнне ў прыродным газе. Састаў прыроднага газу розных радовішчаў неаднолькавы. У табліцы прыведзена прыкладная колькасць рэчываў у прыродным газе.
| Формула рэчыва | CH4 | С2Н6 | С3Н8 | С4Н10 | N2 і інш. газы |
| Змяшчэнне ў % па аб’ёме | 70—98 | < 5 | < 2 | < 1 | < 10 |
Прыродны газ выкарыстоўваецца ў асноўным у якасці паліва. Ён мае шэраг пераваг над цвёрдым і вадкім палівам: пры яго згаранні вылучаецца больш цяпла, ён не пакідае попелу, прадукты яго згарання больш экалагічна чыстыя. Прыродны газ выкарыстоўваецца на цеплавых электрастанцыях, у якасці гаручага для газавых пліт, паліва для аўтамабіляў г. д.