Беларуская літаратура. 11 клас

Вось і завяршаецца школьны этап літаратурнай адукацыі. На працягу адзінаццаці гадоў вы паслядоўна і сістэматычна далучаліся да мастацтва нацыянальнага слова. Спадзяёмся, што беларуская літаратура была для вас не толькі вучэбным прадметам, але і крыніцай чалавеказнаўства, сродкам эстэтычнага спасціжэння жыцця, яго маральных норм і вартасцей.

Наперадзе вас чакае самастойнае жыццё... Няхай духоўны вопыт, набыты пры вывучэнні лепшых твораў айчыннай літаратуры, зберажэ вас ад памылак і расчараванняў. У самыя скрушлівыя моманты жыцця няхай прыходзяць вам на ўспамін радкі-запавет Алеся Разанава:

Калі ўсе згублены ключы, калі ні шанцу, анічога, Усё ж ідзі, любі, крычы і пасягай на перамогу!

Да апошняга школьнага ўрока беларускай літаратуры прапануем вам напісаць міні-сачыненне на адну з пералічаных ніжэй тэм рэфлексійнага характару:

 

Роля мастацкай літаратуры ў жыцці сучаснага чалавека.

Урокі беларускай літаратуры ў маім жыцці.

Твор нацыянальнай літаратуры, які можна лічыць візітоўкай беларуса і Беларусі.

Мой любімы беларускі пісьменнік.

Разважаючы над прачытанымі кнігамі беларускіх аўтараў...

Кнігу якога беларускага аўтара і чаму я параіў бы прачытаць свайму сябру.

Свет учора, сёння і заўтра.

Каго можна лічыць сапраўдным настаўнікам?

Культура маўлення і духоўнае аблічча чалавека.

 

Можна выканаць альтэрнатыўныя заданні: падрыхтаваць вуснае выказванне па адной з цытат беларускіх пісьменнікаў, змешчаных на форзацы вучэбнага дапаможніка, або напісаць водгук на верш П. Панчанкі «На нягоды жыцця не жальцеся...»:

На нягоды жыцця не жальцеся, Не было б перамог без нягод. Нараджайцеся, нараджайцеся Кожны месяц і кожны год. У вачах любімай дзяўчыны, У вачах суседзяў, сяброў, У вачах прафесараў чынных І забеганых дактароў, І ў шырока раскрытых дзіцячых Вачанятах, І ў плыткай вадзе. Не старэйце, людзі, дачасна, Нараджайцеся кожны дзень. 1974