§ 46. Шчолачныя металы
Сайт: | Профильное обучение |
Курс: | Хімія. 11 клас |
Книга: | § 46. Шчолачныя металы |
Напечатано:: | Гость |
Дата: | Воскресенье, 5 Май 2024, 22:07 |
Шчолачнымі названы металы, якія ўтвараюць шчолачы — растваральныя ў вадзе асновы. Да іх адносяцца элементы IA-групы — літый Li, натрый Na, калій K, рубідый Rb, цэзій Cs і францый Fr.
Агульныя звесткі пра шчолачныя металы
Шчолачныя металы як хімічныя элементы аб’ядноўвае аднолькавая будова валентнага электроннага слоя атамаў, электронная канфігурацыя якога ў асноўным стане выяўляецца формулай ns1 (табл. 32). Шчолачныя металы валодаюць нізкай электраадмоўнасцю. Валентны электрон слаба звязаны з атамам з-за малой велічыні зарадаў, якія ўзаемадзейнічаюць, і вялікага памеру атама. Гэта вызначае высокую хімічную актыўнасць шчолачных металаў і яе ўзмацненне па групе зверху ўніз у сувязі з павелічэннем радыуса атамаў і паслабленнем узаемадзеяння валентных электронаў з ядром. Пры аддачы валентных электронаў атамы праяўляюць ступень акіслення +1 і ўтвараюць, як правіла, злучэнні з іонным тыпам хімічнай сувязі.
Табліца 32. Характарыстыкі атамаў і простых рэчываў шчолачных металаў
Элемент | Li | Na | K | Rb | Cs |
Электронная канфігурацыя | [He]2s1 | [Ne]3s1 | [Ar]4s1 | [Kr]5s1 | [Xe]6s1 |
Радыус, нм | 0,159 | 0,171 | 0,216 | 0,229 | 0,252 |
Электраадмоўнасць | 1,0 | 0,9 | 0,8 | 0,8 | 0,7 |
Шчыльнасць, г/см3 | 0,53 | 0,97 | 0,86 | 1,53 | 1,87 |
Тэмпература плаўлення, °С | 180,5 | 97,8 | 63,6 | 38,8 | 28,5 |
У табліцы 32 падсумаваны звесткі аб будове і ўласцівасцях атамаў шчолачных металаў, а таксама супастаўлены фізічныя ўласцівасці простых рэчываў. Прыведзеныя даныя паказваюць, што шчолачныя металы маюць невялікую шчыльнасць і нізкія тэмпературы плаўлення. Шчолачныя металы ўяўляюць сабой крышталічныя рэчывы з добрай электра- і цеплаправоднасцю.
У зямной кары самымі распаўсюджанымі са шчолачных металаў з’яўляюцца натрый і калій (па 2,4 %). Астатнія s-элементы IA-групы адносяцца да рэдкіх элементаў.
З прычыны высокай хімічнай актыўнасці шчолачныя металы знаходзяцца не ў свабодным стане, а ў выглядзе злучэнняў. Большая частка атамаў натрыю і калію ўваходзіць у састаў розных сілікатаў, у тым ліку і алюмасілікату — палявога шпату. У прамысловых маштабах здабываюць галіт, каменную соль (NaCl), сільвін (KCl), сільвініт (сумесь KCl і NaCl). Рэспубліка Беларусь валодае вялікімі запасамі гэтых солей. Да прыродных злучэнняў адносяцца таксама салетры — NaNO3, KNO3 і мірабіліт — Na2SO4 · 10H2O.
Распазнаць прысутнасць у рэчыве іонаў шчолачнага металу можна па характэрнай афарбоўцы полымя гарэлкі пры ўнясенні ў яго ўзору рэчыва на жалезным (плацінавым, ніхромавым) дроце (мал. 109, Дадатак 3).
Гэты эфект пакладзены ў аснову спектраскапічных метадаў якаснага і колькаснага вызначэння шчолачных металаў.
Атрымліваюць шчолачныя металы электролізам расплаваў іх солей, напрыклад:
Хімічныя ўласцівасці шчолачных металаў
Шчолачныя металы ўзаемадзейнічаюць з многімі простымі рэчывамі неметаламі. Так, з галагенамі шчолачныя металы рэагуюць без награвання, з серай, вадародам і азотам — пры награванні, за выключэннем літыю, які ўзаемадзейнічае з азотам пры пакаёвай тэмпературы:
Звярніце ўвагу, што гідрыды з’яўляюцца моцнымі адноўнікамі. Яны аднаўляюць вадарод з вады: NaH + H2O = NaOH + H2↑.
На паветры на паверхні шчолачных металаў утвараецца рад злучэнняў. Літый найменш актыўны. Калій можа загарэцца самаадвольна. Таму шчолачныя металы захоўваюць у добра закаркаваных слоіках пад слоем газы або ў запаяных ампулах.
Пры згаранні на паветры шчолачныя металы ўтвараюць злучэнні, у якіх утрыманне кіслароду павялічваецца ад Li да Cs:
- • літый утварае аксід: 4Li + O2 = 2Li2O;
- • натрый — пераксід Na2О2: 2Na + O2 = Na2O2;
- • калій, рубідый, цэзій — надпераксіды KO2, RbO2, CsO2: K + O2 = KO2.
Аксід натрыю Na2O можна атрымаць толькі ўскосным шляхам, награваючы пераксід натрыю з металічным натрыем:
Шчолачныя металы пачынаюць рад актыўнасці і здольныя аднаўляць вадарод з вады з утварэннем шчолачы:
Гэтая рэакцыя суправаджаецца моцным экзатэрмічным эфектам, і вадарод, які вылучаецца, можа загарэцца. Для найбольш актыўных шчолачных металаў такі працэс суправаджаецца выбухам, таму шчолачныя металы старанна ахоўваюць ад вады. Яшчэ больш энергічна гэтыя металы ўзаемадзейнічаюць з кіслотамі.
Шчолачныя металы рэагуюць таксама з феноламі і спіртамі:
2Na + 2C2H5OH = 2C2H5ONa + H2↑.
Злучэнні шчолачных металаў
Злучэнні шчолачных металаў, як правіла, крышталічныя, добра растваральныя ў вадзе рэчывы, якія не маюць афарбоўкі.
Аксіды металаў IA-групы ўзаемадзейнічаюць з вадой, кіслотнымі і амфатэрнымі аксідамі, кіслотамі, што характэрна для тыповых асноўных аксідаў.
Аксіды шчолачных металаў раствараюцца ў вадзе з утварэннем гідраксідаў:
узаемадзейнічаюць з газападобнымі кіслотнымі аксідамі:
з цвёрдымі кіслотнымі і амфатэрнымі аксідамі пры награванні, а часам нават пры плаўленні сумесі кампанентаў:
з кіслотамі, утвараючы сярэднія або кіслыя солі ў залежнасці ад асноўнасці кіслаты і суадносін кампанентаў, напрыклад:
Аксіды шчолачных металаў могуць узаемадзейнічаць з кіслымі солямі:
Na2О2 ўзаемадзейнічае з вадой, утвараючы пераксід вадароду:
Пераксід вадароду можа раскладацца з утварэннем атамарнага кіслароду: H2О2 = H2О + O↑. Таму Na2О2 прымяняюць для адбельвання саломы, шоўку, воўны і іншых матэрыялаў. Эфект адбельвання абумоўлены ўздзеяннем атамарнага кіслароду.
Пераксід натрыю выкарыстоўваюць у процівагазах, пры падводных работах. Яго прымяненне ў гэтых выпадках заснавана на рэакцыі ўзаемадзеяння з дыаксідам вугляроду:
Na2O2 + CO2 → Na2CO3 + O2↑.
Вуглякіслы газ, які выдыхаецца лёгкімі, паглынаецца з адначасовым вылучэннем газападобнага кіслароду. Апошні зноў можа служыць для дыхання.
Гідраксіды шчолачных металаў — крышталічныя рэчывы, якія плавяцца без раскладання. Усе гідраксіды моцна паглынаюць вільгаць з паветра і могуць выкарыстоўвацца як асушальнікі. Яны добра растваральныя ў вадзе і дысацыіруюць у ёй цалкам:
Тыповыя хімічныя ўласцівасці шчолачаў вы сістэматызавалі пры вывучэнні матэрыялу § 27, табліцы 18, разглядаючы іх у святле тэорыі электралітычнай дысацыяцыі. Нагадаем, што шчолачы ўступаюць у рэакцыі з кіслотамі, солямі, кіслотнымі і амфатэрнымі аксідамі, амфатэрнымі гідраксідамі. NaOH і KОН у прамысловасці атрымліваюць электролізам водных раствораў хларыдаў:
Солі шчолачных металаў за невялікім выключэннем добра раствараюцца ў вадзе і з’яўляюцца моцнымі электралітамі.
Солі шчолачных металаў рэагуюць з кіслотамі, солямі іншых металаў толькі ў выпадку выпадзення прадукту ў асадак, утварэння маладысацыіраванага або газападобнага рэчыва. Прыклады рэакцый прыведзены раней у табліцах 17, 19. Вам ужо вядома, што солі галагенавадародных кіслот рэагуюць у растворах з галагенамі (§ 30).
Біялагічная роля і прымяненне злучэнняў шчолачных металаў
Іоны натрыю і калію адыгрываюць важную ролю ў жыццядзейнасці арганізма чалавека і жывёл. У арганізме дарослага чалавека ўтрыманне натрыю складае каля 150 г, а калію — каля 250 г. Іоны натрыю ўплываюць на электралітычны баланс клетак арганізма, удзельнічаюць у транспарце праз мембраны клетак амінакіслот, цукроў, неарганічных і арганічных аніёнаў, ва ўтварэнні страўнікавага соку. Іоны калію вызначаюць узбуджальнасць і праводнасць сардэчнай мышцы, удзельнічаюць у працэсах перадачы нервовых імпульсаў. Літый здольны рэгуляваць актыўнасць ферментаў.
Іоны калію неабходныя для жыцця раслін. Яны знаходзяцца ў асноўным у клетачным соку, дапамагаюць сінтэзу бялкоў і цукроў, назапашванню вугляводаў, нармалізуюць працэс фотасінтэзу, спрыяюць павышэнню механічнай трываласці тканак, устойлівасці да некаторых захворванняў.
Злучэнні шчолачных металаў знайшлі прымяненне ў разнастайных галінах прамысловасці. Да прыкладу, сілікаты літыю неабходны для вырабу трывалай керамікі. Cплаў літыю (7Li) з натрыем служыць эфектыўным цепланасіцелем у ядзерных рэактарах. Літый выкарыстоўваюць у металургіі лёгкіх сплаваў, у вытворчасці акумулятарных батарэй.
Нобелеўскую прэмію па хіміі за 2019 год атрымалі Джон Гудэнаф, Стэнлі Уітынгем і Акіра Ёсіно за распрацоўку літый-іонных батарэй. Літый-іонныя батарэі значна лягчэйшыя і кампактныя, чым больш раннія тыпы акумулятараў. Яны выкарыстоўваюцца ў мабільных тэлефонах, ноўтбуках, кардыёстымулятарах, электрамабілях.
З хларыду натрыю атрымліваюць гідраксід натрыю, пераксід натрыю, хлор, кальцыніраваную соду Na2CO3 і пітную соду NaHCO3 (харчовая дабаўка Е500).
Сульфат натрыю выкарыстоўваюць у шкляной і гарбарнай прамысловасці, вытворчасці мыйных сродкаў і медыцынскіх прэпаратаў.
Сілікат натрыю Na2SiO3 атрымліваюць сплаўленнем NaOH або соды з крэменезёмам:
Ён неабходны для вырабу гарачатрывалага, кіслота- і гідраўстойлівага бетону, вогнетрывалых фарбаў, клеяў, супрацьпажарных пакрыццяў па дрэве (антыпірэнаў), для ўмацавання слабых грунтоў, у вытворчасці электродаў, для ачысткі расліннага і машыннага алеяў.
Гідраксіды натрыю і калію выкарыстоўваюцца для прыгатавання электралітаў шчолачных акумулятараў, а таксама ў вытворчасці мыла, фарбаў, цэлюлозы.
Солі калію KCl, KNO3, K2CO3 — важныя мінеральныя ўгнаенні.
Шчолачныя металы — s-элементы IA-групы з агульнай электроннай канфігурацыяй валентных электронаў слоя атама ns1, за выключэннем вадароду.
Утвараюць злучэнні з іонным тыпам хімічнай сувязі, у якіх праяўляюць ступень акіслення толькі +1.
Валодаюць самай нізкай электраадмоўнасцю і таму самай высокай хімічнай актыўнасцю. Энергічна ўзаемадзейнічаюць з вадой з вылучэннем вадароду і шчолачаў.
Аксіды і гідраксіды валодаюць асноўнымі ўласцівасцямі.
Солі, як правіла, не афарбаваныя і добра растваральныя ў вадзе.
Металы атрымліваюць з прыродных злучэнняў метадам электролізу расплаву солей або гідраксідаў.
Пытанні, заданні, задачы
1. Выкарыстоўваючы даныя табліцы 32, ахарактарызуйце фізічныя ўласцівасці шчолачных металаў. Параўнайце іх з іншымі вядомымі вам металамі. Якія заканамернасці ў змяненні іх уласцівасцей назіраюцца з павелічэннем парадкавага нумара элемента?
2. Як даказаць, што пры ўзаемадзеянні натрыю з вадой утвараецца шчолач?
3. Чым тлумачыцца патрэбнасць чалавека ў солях натрыю і калію? Для чаго іх выкарыстоўваюць у медыцыне?
4. Складзіце ўраўненні рэакцый літыю, натрыю, калію з кіслародам, з вадой.
5. Разлічыце масу хларыду натрыю, неабходную для падрыхтоўкі гіпертанічнага раствору аб’ёмам 1 дм3 (ω = 10 %, ρ = 1,071 г/см3).
6. Прывядзіце ўраўненні рэакцый узаемадзеяння KOH з кіслотамі, кіслотнымі аксідамі, растворамі солей.
7. Запішыце ўраўненні рэакцый атрымання натрыю і калію электролізам расплаву адпаведных солей.
8. Складзіце ўраўненні рэакцый паводле схемы:
9. Вызначце масу шчолачы і аб’ём хлору, што можна атрымаць пры электролізе раствору хларыду натрыю, які змяшчае соль масай 1 кг. Ператварэнню падвяргаецца 82 % солі ад зыходнай колькасці.
10. Дэкагідрат сульфату натрыю (глаўберава соль) Na2SO4 · 10Н2O ў прыродзе сустракаецца ў выглядзе мінералу мірабіліту, які выпадае з марской вады ў заліве-лагуне Кара-Багаз-Гол (Каспійскае мора) у халодны час года. Разлічыце масу глаўберавай солі, якая выпадзе з 10 кг насычанага пры 30 °С раствору гэтай солі, калі яго астудзіць да 0 °С. Растваральнасць Na2SO4 пры 30 °С складае 40,8 г на 100 г вады, а пры 0 °С — 5,0 г на 100 г вады.
*Самакантроль
1. Цвёрдымі рэчывамі з’яўляюцца:
- а) K;
- б) NaH;
- в) LiOH;
- г) KNO3.
2. Формулы мінералаў галіту і мірабіліту адпаведна:
- а) KCl і NaCl;
- б) KNO3 і NaNO3;
- в) KСl і Na2SO4;
- г) NaСl і Na2SO4 ∙ 10H2O.
3. Шчолачны метал можна атрымаць у выніку ператварэння:
- а) KСl(расплаў) ;
- б) NaCl(р-р) ;
- в) NaСl(р-р) + K ;
- г) Na2SO4(р-р) .
4. У рэакцыі натрыю з кіслародам пераважна ўтвараюцца:
- а) NaOH;
- б) Na2O;
- в) Na2O2;
- г) NaH.
5. У адкрытым сасудзе на паветры знаходзіцца кавалачак літыю. На яго паверхні могуць утварыцца:
- а) Li2O;
- б) LiOH;
- в) Li3N;
- г) Li3PO4.