Печатать книгуПечатать книгу

§ 22. Асновы мовы JavaScript

Сайт: Профильное обучение
Курс: Інфарматыка. 11 клас (Павышаны ўзровень)
Книга: § 22. Асновы мовы JavaScript
Напечатано:: Гость
Дата: Суббота, 19 Апрель 2025, 13:13

Оглавление

22.1. Агульныя звесткі

JavaScript (JS) — высокаўзроўневая, мультыпарадыгменная мова праграміравання. Гэта значыць, JS падтрымлівае як аб'ектна-арыентаванае праграміраванне, так і функцыянальнае праграміраванне.

Складаецца JavaScript з трох частак:

1. Ядро (ECMAScript) — базавая функцыянальнасць JavaScript.

2. Аб'ектная мадэль дакумента (Document Object Model, DOM) — сродкі для працы са змесцівам вэб-старонак.

3. Аб'ектная мадэль браўзера (Browser Object Model, BOM) — сродкі для ўзаемадзеяння з браўзерам.

Сцэнарыі JavaScript дазваляюць:

  1. Дадаваць html-код на старонку, змяняць існуючае змесціва, мадыфікаваць стылі.
  2. Ствараць розныя візуальныя эфекты (слайдары, галерэі малюнкаў, дынамічны тэкст і г. д.).
  3. Рэагаваць на дзеянні карыстальніка, пстрычкі мышы, перамяшчэння паказальніка, націск клавіш.
  4. Выводзіць інфармацыю ў новых вокнах.
  5. Задаваць пытанні наведвальніку, паказваць паведамленні.
  6. Запамінаць даныя на баку кліента.

Скрыпт можа быць устаўлены ў любое месца html-дакумента з дапамогай тэга <script> (прыклад 22.1).

Скрыпт або спасылкі на яго, размешчаныя ў загалоўку html-дакумента, могуць быць выкарыстаны для вызначэння рэакцый на карыстальніцкія падзеі. У выпадку размяшчэння скрыпту або спасылкі ў целе html-дакумента скрыпт выконваецца пры загрузцы вэб-старонкі і можа непасрэдна выкарыстоўвацца для фарміравання зместу старонкі падчас загрузкі.

Скрыпт можна змясціць у асобны файл з пашырэннем .js. Файл са скрыптам можа быць створаны ў любым рэдактары кода, гэтак жа як html-файлы і css-файлы.

Як правіла, толькі самыя простыя скрыпты змяшчаюцца ў html-дакумент. Больш складаныя вылучаюцца ў асобныя файлы. Файл скрыпту можна падключыць да html-дакумента з дапамогай атрыбута src (прыклад 22.2).

У адным тэгу <script> нельга выкарыстоўваць адначасова атрыбут src і код унутры (прыклад 22.3).

Сінтаксіс JavaScript падобны з сінтаксісам мовы C++. Гэтак жа як і ў С++, код JavaScript змяшчае сінтаксічныя канструкцыі і каманды, якія адпавядаюць вызначаным дзеянням — інструкцыі. Падзяляюцца інструкцыі кропкай з коскай.

У JavaScript можна скарыстацца стандартнымі метадамі працы з дыялогавымі вокнамі для ўводу-вываду даных (прыклад 22.4):

1) alert() — дазваляе выводзіць дыялогавае акно з зададзеным паведамленнем і кнопкай OK. Метаду перадаецца толькі адзін радок. Каб адлюстраваць шматрадковае паведамленне, у месцы раздзялення радка трэба дадаць \n.

2) confirm() — дазваляе вывесці дыялогавае акно з паведамленнем і двума кнопкамі — OK і Отмена. Метад вяртае лагічную велічыню, значэнне якой залежыць ад таго, які выбар зрабіў карыстальнік.

3) prompt() — выводзіць на экран дыялогавае акно, якое запытвае ў карыстальніка інфармацыю. Акрамя кнопкі ОК і Отмена ў акне ёсць тэкставае поле для ўводу даных. Метад прымае два параметры: паведамленне і значэнне, якое павінна з'явіцца ў тэкставым полі па змоўчанні. Вяртае значэнне, уведзенае ў тэкставым полі, калі абраць OK. Калі выбіраецца Отмена або акно зачыняецца іншым чынам, то вяртаецца null.

На час паказу дыялогавага акна выкананне кода прыпыняецца і аднаўляецца пасля яго закрыцця.

Мова JavaScript інтэрпрэтаваная, а гэта азначае, што калі ў скрыпце ёсць памылка, то браўзер проста праігнаруе памылковы код. Выканаць адладку скрыпту можна, выкарыстоўваючы спецыяльныя магчымасці браўзера — інструменты распрацоўкі. Дакладны знешні выгляд інструментаў распрацоўкі залежыць ад выкарыстанага браўзера і яго версіі.

У прыкладзе 22.5 разглядаецца выкарыстанне інструментаў распрацоўніка аднаго з папулярных браўзераў.

Мова JavaScript разам з HTML і CSS уваходзіць у базавы набор інструментаў вэб-распрацоўніка. На JavaScript ствараюцца дадаткі, якія выконваюцца ў браўзеры на баку кліента і забяспечваюць інтэрактыўнасць сайтаў.

Абмежаванні магчымасцей мовы JavaScript прадухіляюць доступ да асабістай інфармацыі і перашкаджаюць нанясенню шкоды даным карыстальніка.

Прыклады абмежаванняў JavaScript:

  • Нельга чытаць/запісваць адвольныя файлы на цвёрдым дыску, капіраваць іх ці запускаць праграмы. Прамы доступ да сістэмных функцый АС адсутнічае.
  • Скрыпт з адной старонкі не мае доступу да іншай, калі яны прыйшлі з розных сайтаў.
  • Абмежаваная здольнасць атрымліваць даныя з іншых сайтаў/даменаў.

Прыклад 22.1. JavaScript  у HTML-дакуменце.

1) Размяшчэнне скрыпту (метад alert() дазваляе вывесці які-небудзь тэкст у дыялогавым акне браўзера):

<html>

 <body>

   <p>Пачатак...</p>

     <script>

       alert('Прывітанне свет!')

     </script>

   <p>...Канец</p>

 </body>

 </html>

2) Дыялогавае акно:

3) Вэб-старонка пасля пацверджання дзеяння ў дыялогавым акне:

Прыклад 22.2. Падключэнне js-файла.

<script src = "/js/my.js">

 </script>

Прыклад 22.3. Выкарыстанне тэга <script> і атрыбута src.

Змесціва тэга ігнаруецца пры адначасовым выкарыстанні тэга і атрыбута:

<script src = "my.js">

    alert('Праверка');

 </script>

Можна падзяліць на два тэга:

<script src = "my.js">

 </script>

 <script>

    alert('Праверка');

 </script>

Калі скрыпт знаходзіцца ў асобным js-файле, браўзер загрузіць скрыпт асобна і зможа захоўваць яго ў кэшы (спецыяльным месцы на цвёрдым дыску камп'ютара, куды захоўваюцца раней наведаныя старонкі).

Пры гэтым файл будзе загружацца з сервера толькі адзін раз, што эканоміць трафік і паскарае загрузку старонак.

Прыклад 22.4. Увод-вывад даных у дыялогавыя вокны.

<script>

  alert ('Пачнём працу?')

  var rez =

  prompt('Ваша імя?', '_');

  var ans =

  confirm ('Увод верны?');

</script>

1) alert()

2)  prompt()

3) confirm()

Прыклад 22.5. Выкарыстанне кансолі распрацоўніка Google Chrome.

Парадак працы:

1) Адкрыць вэб-старонку ў браўзеры.

2) Націснуць клавішу F12. Адкрыецца ўкладка:

3) У кансолі паведамленне пра памылку вылучаецца чырвоным колерам (у нашым прыкладзе гэта «Ошибка_здесь») і паказваецца нумар радка кода з памылкай.

Пад паведамленнем пра памылку знаходзіцца сімвал . Ён пазначае камандны радок, у якім можна рэдагаваць і запускаць інструкцыі JavaScript. Для іх запуску трэба націснуць Enter, а для пераходу на новы радок — Shift + Enter.

22.2. Тыпы даных

У мове JavaScript вызначаны простыя і спасылачныя тыпы даных (прыклад 22.6). Усе спасылачныя даныя ставяцца да тыпу даных аб'ект (object).

Пераменныя ў JavaScript аб'яўляе аператар var, ініцыялізуючы іх пры неабходнасці (прыклад 22.7). Імёны пераменных у JavaScript адчувальныя да рэгістра. Неаб'яўленыя пераменныя не існуюць да таго часу, пакуль да іх не выканана прысвойванне. Рэкамендавана заўсёды аб'яўляць пераменныя, па-за залежнасці знаходзяцца яны ўнутры функцыі або ў глабальным кантэксце. Выкарыстанне неаб'яўленых пераменных непрадказальна.

Разгледзім некаторыя канцэпцыі выкарыстання простых тыпаў даных у мове JavaScript:

  1. У JavaScript усе тыпы даных з'яўляюцца дынамічнымі. Гэта азначае, што адна і тая ж пераменная можа выкарыстоўвацца для захоўвання розных тыпаў даных і не трэба відавочна паказваць тып пераменных або тып функцый, якія вяртаюцца (прыклад 22.8).
  2. Лікавы тып даных number выкарыстоўваецца для працы з цэлымі і рэчавымі лікамі ў дыяпазоне ад -253 да 253 (прыклад 22.9).
  3. Цэлыя лікі можна задаваць не толькі ў дзесятковай сістэме злічэння, але і ў двайковай(0b), васьмярковай (0) або шаснаццатковай сістэме злічэння (0x) з выкарыстаннем прэфіксаў, указаных у круглых дужках (прыклад 22.10).
  4. Для запісу радкоў могуць выкарыстоўвацца як адзінарныя, так і двайныя двукоссі (прыклад 22.11).
  5. Выкарыстанне зваротных (касых) двукоссяў дазваляе ўбудоўваць у радок выразы, складаючы іх у ${…} (прыклад 22.12).
  6. Нулявы тып(null) змяшчае адзінае адмысловае значэнне — null. Звычайна яно выкарыстоўваецца для ініцыялізацыі пераменнай, якой пасля будзе прысвоена значэнне.
  7. Пераменныя, абвешчаныя без значэння, маюць значэнне і тып undefined.
  8. Каб вызначыць тып даных пераменнай, выкарыстоўваецца аператар typeof (прыклад 22.13). Гэта выкарыстоўваецца, калі трэба апрацоўваць значэнні розных тыпаў па-рознаму або проста зрабіць праверку.
  9. Каб стварыць значэнне тыпу bigint, неабходна дадаць n у канец запісу колькасці (прыклад 22.14).

JavaScript аўтаматычна ажыццяўляе пераўтварэнне тыпаў пры неабходнасці (няяўна).

Няяўнае пераўтварэнне простых тыпаў даных:

  1. Радковае пераўтварэнне. Для яўнага пераўтварэння ўжываецца аператар "+", у якога адзін з аргументаў радок (прыклад 22.15).
  2. Колькаснае пераўтварэнне. Адбываецца ў матэматычных функцыях і выразах, а таксама пры параўнанні даных розных тыпаў (прыклад 22.16).
  3. Пераўтварэнне да лагічнага значэння. Пераўтварэнне да true/false адбываецца ў запісе ўмовы ў канструкцыях, якія кіруюць, і пры ўжыванні лагічных аператараў (прыклад 22.17).

Пры параўнанні значэнняў розных тыпаў кожнае са значэнняў прыводзіцца да ліку (прыклад 22.18).

У пераважнай большасці выпадкаў няяўнае пераўтварэнне тыпаў у JavaScript лепш пазбягаць і пры неабходнасці пераўтварэння тыпу выкарыстоўваць функцыі пераўтварэння (прыклад 22.19).

Прыклад 22.6. Тыпы даных у JavaScript.

Прыклад 22.7. Аб'ява пераменных.

var n;

//аб'ява пераменнай

      

 var n1, n2, n_end;

//аб'ява групы пераменных

      

 var n = 10;

/* аб'ява і ініцыялізацыя пераменнай */

Прыклад 22.8. Дынамічнасць тыпаў даных у JavaScript.

 var x;

// x мае тып undefined

 

     x = 10;

// цяпер x — лік

 

     x = "Дзесяць";

// цяпер x — радок

Прыклад 22.9. Аб'ява лікаў.

var x1 = 34.00;
var x2 = 34;

Прыклад 22.10. Выкарыстанне ў JavaScript лікаў сістэм злічэння, адрозных ад дзесятковай.

 alert(0b1111); //15

 alert(0xff);   //255

 alert(010);    //8

Прыклад 22.11. Аб'ява радкоў.

 var str = "Прывітанне, свет!";

 var str = 'Прывітанне, свет';

Прыклад 22.12. Убудаванне выраза ў радок.

var name = "Кастусь";

 alert

  (`Добрай ранiцы, ${name}!`);

// Добрай ранiцы, Кастусь!

Прыклад 22.13. Вызначэнне тыпу даных.

typeof ""   // "string"

 

 typeof "Сусвет" //"string"

 

 typeof 121    //"number"

 

 typeof 3.14    //"number"

 

 typeof (5 + 0.5) //"number"

 

 typeof true    //"boolean"

Прыклад 22.14. Выкарыстанне тыпу bigInt.

const big_n = 10257816842624n;

Прыклад 22.15. Радковае пераўтварэнне.

alert(true + "_string");

// "true_string"

  alert("123 + " + 123);

// "123 + 123"

  alert(3 + "5");  // "35"

Прыклад 22.16. Колькаснае пераўтварэнне.

var a = +"123";   // 123

 

alert(3 * "5");  // 15

 

alert(+true);    // 1

 

alert(+false);    // 0

Прыклад 22.17. Пераўтварэнне да лагічнага значэння.

Значэнне

Пераўтварэнне

undefined, null

false

Лікі

true
(акрамя 0, NaN — false)

Радкі

true
(акрамя пустога радка "" — false)

Аб'екты

true

 Прыклад 22.18. Параўнанне значэнняў розных тыпаў.

alert('2' > 1);    // true

alert('01' == 1); // true

Прыклад 22.19. Функцыі пераўтварэння тыпаў і іх выкарыстанне.

1) У радок (String):

String(123)        // '123'

 

String(-12.3)     // '-12.3'

 

String(null)    // 'null'

2) У лік (Number, BigInt):

var a = Number("123");  //123

 

const big_n = BigInt(1025781);

//тое ж, што і 1025781n

const

n = BigInt("102578143555533");
//102578143555533

3) У лагічнае значэнне (Boolean):

Boolean('');         // false

Boolean(1);          // true

Boolean(-0);         // false

Boolean(undefined);  // false

22.3. Аб'екты. Метады працы з аб'ектамі

Аб'ект як тып даных складаецца з многіх значэнняў (альбо простых, такіх як лікі і радкі, альбо складаных, напрыклад іншых аб'ектаў), якія называюцца ўласцівасцямі аб'екта. Два асобных аб'екта ў JavaScript ніколі не будуць роўнымі, нават калі яны маюць роўны набор уласцівасцей.

Аб'ява аб'екта ў JavaScript:

var <імя аб'екта> = {
    <уласцівасць_1>:<значэнне>,
    …
    <уласцівасць_n>:<значэнне> };

Разгледзьце прыклад 22.20.

Кожны раз, калі скрыпт спрабуе звярнуцца да ўласцівасці або метаду значэння простага тыпу, інтэрпрэтатар часова пераўтворыць яго ў аб'ект адпаведнага тыпу. Часовыя аб'екты, у якія пераўтворацца значэнні прымітыўнага тыпу, называюць аб'ектамі абгорткамі. Адразу пасля звароту да ўласцівасці або метаду аб'ект абгортка знішчаецца. Аб'екты абгорткі ствараюцца толькі для значэнняў тыпу number, string і boolean.

Аб'ект String будзе мець тып даных object, калі ён створаны з дапамогай аператара new (прыклад 22.21). Апісанне і прыклады выкарыстання некаторых стандартных метадаў працы з аб'ектам string прыведзены ў Дадатку.

У JavaScript для захоўвання упарадкаваных даных выкарыстоўваецца структура даных масіў — Array. Элементы масіва нумаруюцца, пачынаючы з нуля. Існуе некалькі спосабаў аб'явы масіву (прыклад 22.22).

Памер масіву можа павялічвацца і памяншацца ў любы час. Атрыбут масіву length вызначае агульную колькасць элементаў масіву. У масіве могуць захоўвацца элементы любога тыпу (прыклад 22.23).

Масівы пашыраюць аб'екты, так як прадугледжваюць спецыяльныя метады для працы са спарадкаванымі структурамі даных. Апісанне і прыклады выкарыстання некаторых стандартных метадаў працы з аб'ектам Array прыведзены ў Дадатку.

Для захоўвання матэматычных канстант і функцый у JavaScript прызначаны аб'ект Math. Метады, з якімі працуе гэты аб'ект, аналагічныя матэматычным функцыям, якія выкарыстоўваюцца ў мове С++ (прыклад 22.24). Гэты аб'ект не працуе з лікамі тыпу BigInt.

Для працы з датай і часам у JavaScript выкарыстоўваюцца аб'екты Date. Такія аб'екты могуць быць створаны толькі шляхам выкліку функцыі Date з выкарыстаннем аператара new. Некаторыя ўласцівасці аб'екта Date:

  • Утрымліваюць дату ў выглядзе ліку мілісекунд, якія прайшлі з 01.01.1970.
  • Нумарацыя месяцаў пачынаецца з 0.
  • Калі перададзены два аргументы, адсутныя аргументы ўстанаўліваюцца ў стартавыя значэнні.
  • Выклік функцыі Date без аператара new верне радок з бягучай датай і часам.
У прыкладах 22.25 і 22.26 разгледжаны выпадкі выкарыстання аб'екта Date і метады працы з аб'ектамі такога тыпу.

Прыклад 22.20. Стварэнне аб'екта.

var

person = {firstName: "Ян",

         lastName: "Тур",

         age: 20,

         eyeColor: "шэры"};

Прыклад 22.21. Аб'ект String.

var
str = "Гэта просты радок";

 

var
s_O = new String("Аб'ект String");

 

typeof strLit   //string

 

typeof s_O      //object

Прыклад 22.22. Спосабы аб'явы масіва.

var holidays =

["1 мая","7 чэрвеня","3 ліпеня"];

 

var holidays = new Array

("1 мая", "7 чэрвеня", "3 ліпеня");

 

var holidays = new Array(3);

  holidays[0] = "1 мая";

  holidays[1] = "7 чэрвеня";

  holidays[2] = "3 ліпеня";

Прыклад 22.23. Масіў элементаў з розным тыпам даных. Вызначэнне колькасці элементаў.

 var a = [23, "Ян", true,

  function() {alert("свет");}];

 

 alert(a[1]);      // Ян

 

 alert(a.length);  // 4

Прыклад 22.24. Выкарыстанне метадаў аб'екта Math.

var x = Math.PI;

 

 var y = Math.sqrt(16);

 

 var z = Math.round(4.7);

Трыганаметрычныя функцыі прымаюць у параметрах або вяртаюць вуглы ў радыянах. Для пераўтварэння радыянаў у градусы трэба падзяліць іх на велічыню Math.PI/180. Для пераўтварэння ў зваротным кірунку трэба памножыць градусы на гэтую ж велічыню.

Прыклад 22.25. Стварэнне аб'екта Date.

 new Date();

// бягучая дата і час

 

 new Date(0);

/* колькасць мілісекунд, якія прайшлі з 01.01.1970 */

 

 new Date(1982, 8, 19);

// 1982-09-19

 

 new Date("January 1, 2022");

// 2022-01-01

 

 new Date(2020, 13, 1);

 new Date(2021, 1, 1);

/* абедзве функцыі будуць утрымліваць дату 2021-02-01 */

 

 new Date(2021, 0, 1, 2, 3, 4);

// 2021-01-01 02:03:04

Прыклад 22.26. Метады аб'екта Date.

Метады

Апісанне

getFullYear()

Атрымаць год

(з 4 лічбаў)

getMonth()

Атрымаць месяц

(ад 0 да 11)

getDate()

Атрымаць лік месяца

(ад 1 да 31)

getHours() getMinutes() getSeconds()

Атрымаць адпаведныя кампаненты часу

getDay()

Атрымаць дзень тыдня

 

var d = new Date(2021, 1, 28);

 

  d.setDate(d.getDate() + 2);

  alert(d); // 2 сакавіка, 2021

 

var d = new Date;

 

  d.setDate(-1);

  alert(d);

/* перадапошні лік

папярэдняга месяца */

Пытанні да параграфа

1. Якія дынамічныя паводзіны вэб-старонкі рэалізуюць з дапамогай мовы JavaScript?

2. З сінтаксісам якой мовы праграмавання падобны сінтаксіс мовы JavaScript?

3. Якім чынам можна ўкараніць скрыпт у html-дакумент?

4. У чым розніца паміж скрыптам, размешчаным у загалоўку html-дакумента, і скрыптам, размешчаным у целе html-дакумента?

5. Якія метады выкарыстоўваюцца для арганізацыі ўводу-вываду ў дыялогавыя вокны? У чым іх адрозненне?

6. Якое пашырэнне маюць файлы, якія змяшчаюць скрыпты?

7. Якія магчымасці адладкі скрыптоў маюць браўзеры?

8. Якія тыпы даных вызначаны ў мове JavaScript?

9. Як абвяшчаюцца пераменныя ў мове JavaScript?

10. У чым заключаецца дынамічнасць тыпаў даных у мове JavaScript?

11. Якія тыпы даных выкарыстоўваюцца для захоўвання лікаў, радкоў? У чым асаблівасці іх выкарыстання?

12. У чым заключаецца яўнае і няяўнае пераўтварэнне тыпаў даных?

13. Якія тыпы даных з'яўляюцца аб'ектамі ў мове JavaScript?

14. Да якіх тыпаў даных могуць быць створаны аб'екты абгорткі?

Практыкаванні

 

1. Напішыце скрыпт, які адлюстроўвае дыялогавае акно з паведамленнем: "Прывітанне, javascript!". Словы "Прывітанне" і "javascript!" павінны адлюстроўвацца на розных радках дыялогавага акна.

2. Напішыце скрыпт, пасля запуску якога з'явіцца запыт: "Ваша імя?", а затым, пасля ўводу імені і пстрычкі па кнопцы OK, у дыялогавым акне браўзера метадам alert() павінна быць выведзена імя.

3. Стварыце старонку, якая спачатку выводзіць акно з запытам: "Увядзіце сваё імя". Пасля ўводу карыстальнікам імені на старонцы павінна з'явіцца акно з запытам пацверджання: "Пацвердзіце правільнасць уводу". Пасля націску OK павінна з'явіцца акно прывітання: "Добры дзень, <уведзенае_імя>".

4. Вызначце пераменныя s, n, f і t са значэннямі "Прывітанне", 123, true, "true". Пры дапамозе аператара вызначэння тыпу пераканайцеся, што пераменныя належаць тыпам: string, number, boolean. Для вываду вынікаў выкарыстоўвайце функцыю alert().

5. Знайдзіце значэнні выразаў: 5 + 3; 5 — 3; 5 * 3; 5 / 3; 5 % 3; 3 % 5; 5 + '3'; '5' — 3; 75 + 'кг'. Для вываду вынікаў выкарыстоўвайце функцыю alert().

6. Вызначыце тып выніку выразаў. Вынік запішыце ў табліцу:

Выраз

9 / "3"

"number"+1+3

1+3+"number"

"4px"-3

null+1

Тып выніку

 

 

 

 

 

 7. Ёсць тры пераменныя var a = 1, b = 3, c = "крэслаў". Складзіце пераменныя так, каб у выніку атрымаўся выраз: "12 крэслаў". Для вываду вынікаў выкарыстоўвайце функцыю alert().

8. Дадзена:
var x = 15 * 4 + 25 - 55;

Выведзіце значэнне гэтага выразу ў дыялогавае акно. Змяніце выраз, расставіўшы прыярытэтныя дужкі так, каб атрымаць лік -390.

9. Дадзены лік n = 12345. Запішыце кожную лічбу гэтага ліку ў асобны элемент масіва a. Выведзіце вынік.

10. Напішыце функцыю, якая прымае ў якасці аргумента радок і выдаляе з радка паслядоўнасці любых прабельных знакаў. Арганізуйце ўвод і вывад.

11. Напішыце функцыю, якая пераўтворыць першую літару кожнага слова радка s у верхні рэгістр. Арганізуйце ўвод і вывад.

12. Дадзены радок s. Рэалізуйце абразанне радка па наступным прынцыпе: калі колькасць знакаў у радку больш зададзенага d, то ў пераменную rez запішыце першыя d знакаў радка s і дадайце ў канец тры кропкі '...'. Калі колькасць знакаў у радку менш або роўна d, у пераменную rez запішыце змесціва пераменнай s без зменаў.

13. Знайдзіце гіпатэнузу з прамавугольнага трохвугольніка па тэарэме Піфагора.

Для задання велічынь катэтаў a і b выкарыстоўвайце функцыю:

Math.random() * (max - min) + min;

Для фармаціравання вываду выкарыстоўвайце метад .toFixed()

Узор вываду:

14. Дадзены тры масіва лічбаў: [34,67,0] [14,5,36] [71,58,9]. Напішыце код, які аб'ядноўвае гэтыя масівы і выклікае прыхільнасць лічбы ў выніковым масіве ў парадку змяншэння іх значэнняў праз прабел.

15. Напішыце скрыпт, які выведзе ў дыялогавае акно дзень тыдня вашага дня нараджэння.

16. Напішыце скрыпт, які выведзе ў дыялогавае акно колькасць дзён, якія засталіся да якой-небудзь даты.