Печатать книгуПечатать книгу

§ 24. Использование SQL для построения запросов

Сайт: Профильное обучение
Курс: Інфарматыка. 10 клас (Павышаны ўзровень)
Книга: § 24. Использование SQL для построения запросов
Напечатано:: Гость
Дата: Четверг, 9 Май 2024, 03:09

Оглавление

24.1. Мова запытаў SQL

Майстар запытаў і Канструктар — усяго толькі візуальныя інструменты для стварэння запытаў. Любы запыт, створаны ў Access з дапамогай візуальных інструментаў, можна прагледзець у рэжыме SQL (прыклад 24.1). У гэтым рэжыме запыт адлюстроўваецца як запіс на мове SQL (англ. Structured Query Language — структураваная мова запытаў).

SQL з’яўляецца найважнейшым кампанентам тэхналогіі рэляцыйных баз даных і падтрымліваецца практычна ўсімі сістэмамі кіравання БД. Любому прафесіяналу, як кваліфікаванаму карыстальніку баз даных, так і прыкладному праграмісту ці адміністратару БД, неабходна ведаць SQL.

Некаторыя магчымасці мовы  SQL:

  1. Стварэнне, змяненне і выдаленне табліц БД. 
  2. Выбарка інфармацыі з БД.
  3.  Дабаўленне запісаў у табліцу БД.
  4.  Рэдагаванне і выдаленне запісаў у табліцы БД.

SQL нельга залічыць да традыцыйных моў праграміравання. Ён з’яўляецца дэкларатыўнай мовай, прызначанай для апісання, змянення і вымання даных. У цяперашні час дзякуючы з’яўленню магчымасці захоўваць працэдуры, апрацоўваць іерархічныя тыпы даных і іншым расшырэнням SQL сталі называць мовай праграміравання.

Перавагі мовы  SQL:

  1. Дэкларатыўнасць — паказвае, якія аперацыі трэба выканаць. Спосаб іх рэалізацыі выбіраецца аўтаматычна.
  2.  Наяўнасць міжнародных стандартаў.
  3.  Незалежнасць ад пэўнай СКБД

Недахопы мовы  SQL:

  1. Стандарт мовы складаны і аб’ёмны.
  2. Магчымасць адступлення ад стандарту (шмат якія кампаніі ўносяць свае змяненні ў мову).

Сінтаксіс SQL блізкі да натуральнай англійскай мовы. Каманды SQL выглядаюць як звычайныя сказы англійскай мовы і простыя ў разуменні.

Каманда SQL складаецца з аператараў (ключавых слоў) і ідэнтыфікатараў (прыклад 24.2). Калі ў запыце некалькі каманд, то ў канцы каманды ставіцца кропка з коскай (;).  У Access адначасова можна выканаць толькі адну каманду SQL, таму кропку з коскай можна не ставіць. Паводле агульнапрынятага стылю для запісу ключавых слоў рэкамендуецца выкарыстоўваць вялікія літары.

Калі ідэнтыфікатар змяшчае прабелы, то ён ставіцца ў квадратныя дужкі  (прыклад 24.3).

У Access выкарыстоўваецца інтэрактыўная версія мовы SQL — Microsoft Jet SQL. Каб стварыць запыт SQL у Access (прыклад 24.4), неабходна:

1) перайсці ў меню Создание;

2) выбраць Конструктор запросов;

3) закрыць акно Добавление таблицы;

4) выбраць Режим SQL;

5) у акне, якое адкрыецца, ўвесці тэкст запыту і пры неабходнасці захаваць запыт;

6) выканаць запыт, націснуўшы    кнопку на Панели инструментов.

У Access рэалізаваны наступныя складовыя часткі мовы  SQL:

  1. Мова вызначэння даных (Data Definition Language — DDL). Выкарыстоўваецца для вызначэння структуры базы даных.
  2.  Мова маніпулявання данымі (Data Manipulation Language — DML). Дае магчымасць выбаркі інфармацыі з базы даных і яе пераўтварэння.

Прыклад 24.1. Напісанне запыту на мове SQL.

Табліца БД:

Запыт у рэжыме Канструктар, які дазваляе знайсці сеансы, кошт білетаў на якія не перавышае  9 р. 50 к.:

Вынік запыту (рэжым табліцы):

ЗапытSQL:

 

Мова SQL была прапанавана кампаніяй IBM у пачатку 70-х гг. для праверкі магчымасцей рэляцыйнай мадэлі БД.

Распрацоўшчыкі мовы запытаў SQL:

 

Дональд Чэмбэрлін
(Donald D. Chamberlin)

Рэй Бойс
(Ray Boyce)

Першы міжнародны стандарт мовы SQL быў прыняты ў 1989 г.

У цяперашні час дзейнічае стандарт, прыняты ў 2003 г. (SQL:2003), з некаторымі мадыфікацыямі і дапаўненнямі, занесенымі пазней (SQL:2008, SQL:2011, SQL:2016).

SQL з’яўляецца непрацэдурнай мовай праграміравання. Каманды SQL могуць выконвацца непасрэдна ў інтэрактыўным рэжыме, а таксама ўбудоўваюцца ў базавую мову праграміравання, якой можа быць любая стандартная мова, напрыклад C++.

Прыклад 24.2. У запыце SQL з 24.1:

Аператары

SELECT — вызначае палі, якія змяшчаюць запытаныя даныя.

FROM — вызначае табліцу, якая змяшчае палі, паказаныя ў  SELECT.

WHERE — вызначае ўмовы адбору палёў, якім павінны адпавядаць усе запісы, што ўключаюцца ў вынікі.

Ідэнтыфікатары палёў

Сеансы. Кинотеатр, Сеансы. Фильм, Сеансы. Время, Сеансы. Стоимость — змяшчаюць адрас (імя аб’екта БД) і назва поля.

Прыклад 24.3. Сінтаксіс ідэнтыфікатараў  SQL.

Запыт:

SELECT Товары.[Номер склада], Товары.Наименование, Товары.Поставщик, Товары.Цена, Товары.Количество

FROM Товары

WHERE (((Товары.[Номер склада])=2))

Результат:

Прыклад 24.4. . Стварэнне запыту SQL у Access.

Выбар рэжыму SQL:

Акно для ўводу запыту SQL:

24.2. Вызначэнне структуры базы даных

З дапамогай аператараў DDL мовы SQL вызначаецца структура БД, г. зн. ствараюцца аб’екты базы даных  (прыклад 24.5) і задаюцца іх уласцівасці.

Прызначэнне каманд DDL вызначаецца першым словам у запісе каманды:

  • CREATE (стварыць) — стварае аб’ект базы даных (табліцу, уяўленне і інш.);
  • ALTER (змяніць) — змяняе аб’ект;
  • DROP (выдаліць) — выдаляе аб’ект.

Сінтаксіс каманды DDL:

<OPERATOR><OBJECT> <NAME> [параметры]

Сінтаксіс каманды на стварэнне табліцы базы даных:

CREATE TABLE <імя_табліцы>
  (<имя_поля> <тып_даных у полі>
  [<абмежаванні_ ў полі>], ...)

Асноўныя тыпы даных, якія выкарыстоўваюцца ў DDL, у параўнанні з тыпамі даных у Access:

Тып

Тып даных в Access

COUNTER

Лічыльнік

INT

Доўгае цэлае

SMALLINT

Цэлае

DECIMAL

Адзінарнае з плаваючым пунктам

FLOAT

Двайное з плаваючым пунктам

BIT

Лагічны

CHAR

Кароткі тэкст (не больш 255 сімвалаў)

NCHAR

Доўгі тэкст

DATETIME

Дата і час

MONEY

Грашовы

Асноўныя абмежаванні SQL для даных у палях табліцы  БД:

Абмежаванне

Апісанне

DEFAULT

Прымаць значэнне па змоўчанні

NOT NULL

Забарона на адсутнасць значэнняў

UNIQUE

Забарона паўтораў значэнняў

PRIMARY KEY

Першасны ключ

Спіс абмежаванняў у аператары CREATE TABLE можа адсутнічаць, таму ва ўяўленні сінтаксісу ён ставіцца ў квадратныя дужкі.

У прыкладзе 24.6 прыведзены каманды на стварэнне і выдаленне табліцы базы даных.

У DDL рэалізавана магчымасць змянення аб’ектаў БД — аператар ALTER. З дапамогай гэтага аператара можна змяняць структуру табліцы, дабаўляючы ці выдаляючы палі, змяняць тып поля, дабаўляць ці выдаляць абмежаванні  (прыклад 24.7).

Сінтаксіс каманды на змяненне табліцы  БД:

ALTER TABLE <імя_табліцы> <дзеянні па змяненні>

Прыклад 24.5. Некаторыя з аб’ектаў у DDL.

DATABASE

База даных

TABLE

Табліца

SCHEMA

Схема

CONSTRAINT

Абмежаванне

ATTRIBUTE

Уласцівасць

VIEW

Уяўленне

INDEX

Індэкс

Прыклад 24.6. Стварэнне і выдаленне табліцы базы даных з дапамогай запытаў SQL.

1. Стварэнне:

CREATE TABLE [Сеансы в мае] 
(Код INT PRIMARY KEY, 
Фильм VARCHAR(50) NOT NULL, 
Время TIME NOT NULL, 
Стоимость MONEY)

Каманда стварае табліцу «Сеансы в мае» наступнай структуры:

Палі табліцы:

    • Код — цэлае (INT), першасны ключ табліцы (PRIMARY KEY).
    • Фільм — радок даўжынёй да 50 сімвалаў (VARCHAR(50)), устаноўлена забарона на адсутнасць значэнняў (NOT NULL).
    • Час — поле для захоўвання часу (TIME), устаноўлена забарона на адсутнасць значэнняў (NOT NULL).
    • Кошт — поле для захоўвання грашовай сумы (MONEY).

2. Выдаленне:

   DROP TABLE [Сеансы в мае]  

Прыклад 24.7. Выкарыстанне аператара ALTER для змянення табліцы БД.

1. Дабаўленне поля:

ALTER TABLE [Сеансы в мае] 
ADD COLUMN [Наличие билетов] CHAR

У табліцу «Сеансы в мае» будзе дабаўлена поле «Наличие билетов» з тыпам даных «Короткий текст». Даўжыня тэксту абмежавана значэннем па змоўчанні (255 сімвалаў).

2. Абнаўленне поля:

ALTER TABLE [Сеансы в мае] 
ALTER COLUMN [Наличие билетов] CHAR(10)

Для поля «Наличие билетов» табліцы «Сеансы в мае» будзе зменена абмежаванне па даўжыні тэксту (устаноўлена абмежаванне 10 сімвалаў).

3. Выдаленне поля:

ALTER TABLE [Сеансы в мае] 
DROP COLUMN [Наличие билетов]

Поле «Наличие билетов» будзе выдалена з табліцы «Сеансы в мае».

24.3. Маніпуліраванне данымі ў табліцы БД

Мова маніпулірявання данымі DML уключае аператары, якія змяняюць стан даных. Гэтымі аператарамі з’яўляюцца:

  • SELECT (выбраць) — выбар даных з табліц
  • INSERT (уставіць) — дабаўленне даных у табліцу.
  • UPDATE (абнавіць) — змяненне даных у табліцы.
  • DELETE (выдаліць) — выдаленне даных з табліцы.

INSERT

Сінтаксіс аператара INSERT:

INSERT INTO <імя табліцы>
[(<імя слупка>,...)]
VALUES (<значэнне_поля>,…)

У раздзеле VALUES значэнні палёў павінны быць паказаны ў тым парадку, у якім палі задаваліся пры стварэнні табліцы.

Спіс слупкоў можа адсутнічаць. Калі спіс не паказаны ў аператары, то гэта азначае, што спіс значэнняў павінен быць поўным, г. зн. змяшчаць значэнні для ўсіх палёў табліцы (прыклад 24.8).

У Access адначасова можна дабавіць у табліцу толькі адзін запіс.

SELECT

Аператар SELECT — адзін з найбольш важных і выкарыстоўваемых аператараў DML, які мае найбольш складаную структуру сярод усіх аператараў. Ён дазваляе выбраць даныя з БД і ператвараць да патрэбнага віду атрыманыя вынікі. Вынікам выканання аператара SELECT заўсёды з’яўляецца табліца.

Сінтаксіс аператара SELECT:

    • SELECT <спіс атрыбутаў>
    • FROM <злучаемыя адносіны>
    • [WHERE <умовы выбаркі>]
    • [ORDER BY <крытэрыі сартавання>]
    • [GROUP BY <крытэрыі групіроўкі>]
    • [HAVING <умовы адбору груп>]

У прыкладах 24.9—24.13 разгледжаны розныя варыянты выкарыстання аператара SELECT у адносінах да табліцы «Сеансы» (прыклад 24.1).

У якасці ўмовы выбаркі ў раздзеле WHERE аператара SELECT можна выкарыстоўваць лагічныя выразы, якія выкарыстоўваюць палі табліц, канстанты, знакі параўнання, злучнікі AND і OR, адмаўленне NOT.

Пры запісе ўмоў выкарыстоўваюцца

Для лікаў і дат

Для радкоў
  • <, >, >=, <=
  • IN, BETWEEN — для вызначэння дыяпазону
  • LIKE 'радок' — параўнанне з узорам

Выкарыстанне розных умоў для выбаркі даных разгледжана ў прыкладзе  24.10.

У якасці крытэрыя сартавання ў раздзеле ORDER BY аператара SELECT паказваюцца імёны палёў, па якіх патрабуецца ўпарадкаваць запісы ў табліцы. Сартаванне можна выконваць па некалькіх палях. Прынцып работы такога сартавання аналагічны шматузроўневаму сартаванню ў Excel. Спачатку запісы размяшчаюцца ў тым парадку, які вызначаны для першага поля. Парадак, вызначаны для наступнага поля, упарадкоўвае толькі тыя запісы, якія маюць аднолькавыя значэнні ў першым полі. Далей сартаванне ўжываецца толькі да тых запісаў, якія маюць аднолькавыя значэнні як у першым полі, так і ў другім.

Па змоўчанні запісы ў табліцы сартуюцца па ўзрастанні (ASC), для сартавання ў адваротным парадку неабходна дабавіць ключавое слова DESC (прыклад 24.11).

Пры складанні запытаў пры дапамозе аператара SELECT для атрымання некаторай статыстычнай інфармацыі (сумы, колькасці, сярэдняга значэння і г. д.) выкарыстоўваюцца агрэгіруючыя функцыі. Гэта функцыі, якія працуюць з наборам даных і вяртаюць выніковае значэнне. Асноўныя з іх:

Функцыя

Апісанне

COUNT

Вяртае колькасць значэнняў у паказаным слупку

SUM

Вяртае суму значэнняў у паказаным слупку

AVG

Вяртае сярэдняе значэнне ў паказаным слупку

MIN

Вяртае мінімальнае значэнне ў паказаным слупку

MAX

Вяртае максімальнае значэнне ў паказаным слупку

Усе гэтыя функцыі вяртаюць адзінае значэнне. Пры гэтым функцыі COUNT, MIN і MAX выкарыстоўваюцца ў дачыненні да даных любога тыпу, а SUM і AVG выкарыстоўваюцца толькі для даных лікавага тыпу.

Ужываць агрэгіруючыя функцыі можна ў дачыненні да ўсіх радкоў табліцы (прыклад 24.12), радкоў, вызначаным у раздзеле WHERE (прыклад 24.13) ці да груп радкоў.  У адным запыце можна паказваць некалькі агрэгіруючых функцый, запісаўшы іх праз коску.

Сінтаксіс агрэгіруючых функцый:

<Функцыя>(<выраз>)

У якасці аргумента агрэгіруючай функцыі часцей за ўсё выкарыстоўваецца назва поля табліцы, над значэннямі якога праводзяцца вылічэнні. Таксама дапускаецца ў якасці аргумента выкарыстоўваць выразы, якія ўключаюць у сябе адвольную камбінацыю назваў палёў, канстант, функцый, аб’яднаных арыфметычнымі аперацыямі.

У прыкладзе 24.14 разгледжана ўжыванне агрэгіруючых функцый COUNT, SUM і AVG у аператары SELECT у адносінах да табліцы «Сеансы в мае»:

У раздзеле GROUP BY аператара SELECT запісваецца імя поля, па якім павінна ажыццяўляцца групоўка даных. У гэтым выпадку значэнне агрэгіруючай функцыі вылічваецца для кожнай групы (прыклад 24.15).

Вынікі запытаў можна выкарыстоўваць у іншых запытах — атрымліваецца ўкладзены запыт (прыклад 24.16).

UPDATE

Сінтаксіс аператара UPDATE:
UPDATE <Імя табліцы>
SET <імя поля> = <выраз>
[WHERE <умова абнаўлення>]

З дапамогай аднаго аператара UPDATE могуць быць зададзены значэнні для любой колькасці слупкоў. Аднак у адным і тым жа аператары UPDATE можна ўносіць змяненні ў кожны слупок паказанай табліцы толькі адзін раз. Пры адсутнасці раздзела WHERE будуць абноўлены ўсе радкі табліцы. У прыкладзе 24.17 прыведзены запыт на абнаўленне з указаннем у раздзеле WHERE, якія даныя трэба абнавіць.

DELETE

Выкарыстоўваецца для выдалення запісаў з табліц БД (прыклад 24.18).

Сінтаксіс аператара DELETE:
DELETE FROM <Імя табліцы>
WHERE <умовы выдалення>

Калі раздзел WHERE адсутнічае, выдаляюцца ўсе радкі з табліцы.

Прыклад 24.8. Дабаўленне даных у табліцу.

INSERT INTO [Сеансы в мае] 
VALUES (1, 'Джентельмены', '21:00', 8.50)

Значэнне радка ў гэтым выпадку можна ўводзіць без двукосся, паколькі ў радку няма прабелаў:

   VALUES (1, Джентельмены, '21:00', 8.50)   

Вынік:

Прыклад 24.9. Запыт на выбар усіх даных з табліцы.

   SELECT * FROM Сеансы   

Вынік:

Прыклад 24.10. Запыты на выбар даных, якія задавальняюць некаторую ўмову.

1. Выбраць даныя з палёў «Фильм», «Время», «Стоимость» табліцы «Сеансы» для запісаў, у якіх кошт білета меншы за 10  р.

SELECT Кинотеатр, Фильм, Время, Стоимость
FROM Сеансы
WHERE Стоимость < 10.00

Вынік:

2. Выбраць даныя з палёў «Кинотеатр», «Фильм», «Время», «Стоимость» табліцы «Сеансы» для запісаў, у якіх кошт білета ад 9 да 10 10 р.

SELECT Кинотеатр, Фильм, Время, Стоимость
FROM Сеансы
WHERE Стоимость BETWEEN 9 AND 10

Вынік:

3. Выбраць даныя з палёў «Фильм», «Время», «Стоимость» табліцы «Сеансы» для запісаў, у якіх значэнне поля «Кинотеатр» супадае са значэннем 'Аврора'.

SELECT Фильм, Время, Стоимость
FROM Сеансы
WHERE Кинотеатр LIKE 'Аврора'

Вынік:

4. Выбраць даныя з палёў «Фильм», «Время», «Стоимость» табліцы «Сеансы» для запісаў, у якіх значэнне поля «Кинотеатр» заканчваецца на 'р'.

SELECT Кинотеатр, Фильм, Время
FROM Сеансы
WHERE Кинотеатр LIKE '*р'

Вынік:

Прыклад 24.11. Сартаванне даных у табліцы.

1. Выконваць сартаванне даных у табліцы «Сеансы» па полі «Время» ў парадку ўзрастання.

SELECT Кинотеатр, Фильм, Время
FROM Сеансы
ORDER BY Время

Вынік:

2. Выканаць сартаванне даных у табліцы «Сеансы» па полі «Кинотеатр» у парадку спадання, а па полі «Время» — у парадку ўзрастання.

SELECT Кинотеатр, Фильм, Время
FROM Сеансы
ORDER BY Кинотеатр DESC, Время ASC

Вынік:

Прыклад 24.12. Ужыванне агрэгіруючых функцый да вызначаных радкоў табліцы ў запытах на выбарку.

Знайсці ў табліцы «Сеансы» самы позні сеанс з коштам квітка ад 6 да 9 р.

SELECT MIN (Стоимость) 
AS [Минимальная стоимость] 
FROM Сеансы

Вынік:

Прыклад 24.13. Ужыванне агрэгіруючых функцый да вызначаных радкоў табліцы ў запытах на выбарку.

Знайсці ў табліцы «Сеансы» самы позні сеанс з коштам квітка ад 6 да 9 р.

SELECT MAX (Время) AS [Позний сеанс] FROM Сеансы
WHERE Стоимость BETWEEN 6 AND 9

Вынік:

Прыклад 24.14. Выкарыстанне агрэгіруючых функцый у запытах на выбарку.

1. SUM.

Знайсці ў табліцы «Сеансы в мае» сумарны кошт білетаў.

SELECT SUM (Стоимость) 
AS [Суммарная стоимость] 
FROM [Сеансы в мае]

Вынік:

2. AVG.

Знайсці ў табліцы «Сеансы в мае» сярэдні кошт білетаў з двума лічбамі пасля коскі.

SELECT ROUND(AVG (Стоимость), 2)
AS [Средняя стоимость] 
FROM [Сеансы в мае]

Результат:

Прыклад 24.15. Выкарыстанне агрэгіруючых функцый у дачыненні да груп радкоў у запытах на выбарку.

Знайсці ў табліцы «Сеансы в мае» сумарную колькасць білетаў для кожнага фільма.

SELECT Фильм,
SUM ([Количество билетов])
AS [Кол_билетов]
FROM [Сеансы в мае] GROUP BY Фильм

Вынік:

Прыклад 24.16. Укладзены запыт на выбарку.

SELECT * FROM Туры 
WHERE Цена = (SELECT MIN(Цена) 
FROM Туры 
WHERE Страна = 'Норвегия')

Запыт вяртае даныя з табліцы «Туры» пра самы танны тур у Нарвегію.

Прыклад 24.17. Запыты на абнаўленне табліцы «Сеансы в мае».

UPDATE [Сеансы в мае]
SET [Количество билетов] = [Количество билетов] - 5
WHERE Кинотеатр LIKE 'Мир'

У выніку выканання запыту колькасць білетаў на кожны з сеансаў у кінатэатры «Мир» паменшыцца на 5.

Прыклад 24.18. Запыт на выдаленне даных з табліцы «Сеансы в мае».

DELETE FROM [Сеансы в мае]
WHERE Кинотеатр LIKE 'Мир'

У выніку выканання запыту з табліцы будуць выдалены ўсе сеансы ў кінатэатры «Мир».

Пытанні да параграфу

1. Як стварыць запыт у Access, не выкарыстоўваючы магчымасцей візуальных інструментаў стварэння запытаў?

2. Якія магчымасці ў рабоце з БД маюцца ў мове SQL?

3. Якія складовыя часткі можна вылучыць у мове SQL?

4. Які сінтаксіс напісання ідэнтыфікатараў, калі ў іх прысутнічаюць прабелы?

5. Для чаго прызначаны аператары мовы DDL?

6. Які аператар дазваляе ствараць табліцы БД?

7. З якімі тыпамі даных працуюць аператары мовы DDL?

8. У чым розніца паміж тыпам даных CHAR і VARCHAR?

9. Якія абмежаванні для даных у палях табліцы БД могуць быць запісаны ў запыце SQL?

10. Для чаго прызначаны аператары мовы БД?

11. З дапамогай якога аператара можна дабаўляць у табліцу БД запісы?

12. Выкарыстанне якога аператара дазваляе зрабіць выбарку даных з БД?

13. Які знак выкарыстоўваецца, калі ў запыце SQL мяркуецца вывад даных са ўсіх палёў табліцы?

14. Якая памылка дапушчана ў запыце?

SELECT Дата, Имя from Заказы WHERE Имя = Никита;

15. Што будзе вынікам запыту?

SELECT * FROM Заказы WHERE Дата BETWEEN '2019-01-01' AND '2019-12-31'

16. У якім раздзеле запыту SQL задаюцца крытэрыі сартавання запісаў?

17. Якім чынам сартуюцца даныя, калі крытэрый сартавання не вызначаны?

18. Як называюцца функцыі, якія працуюць з наборам даных і вяртаюць у запыце SELECT выніковыя значэнні?

19. Якім чынам паказваецца ў запыце SELECT набор даных, з якім працуюць агрэгіруючыя функцыі?

20. Ці магчыма выкарыстанне некалькіх агрэгіруючых функцый у адным запыце?

Практыкаванні

    

1. Стварыце базу даных  «Туры.accdb».

  1. Стварыце новую пустую базу даных і ўвядзіце яе імя.
  2.  Стварыце табліцу базы даных з дапамогай SQL-запыту.
  3.  Увядзіце наступную каманду для стварэння табліцы:

CREATE TABLE Туры (
  Код INTEGER NOT NULL PRIMARY KEY,
  Страна VARCHAR(50) NOT NULL,
  Транспорт VARCHAR(20) NOT NULL,
  Цена MONEY NOT NULL)

4. Выканайце гэту каманду. Праверце, што табліца «Туры» сапраўды створана.

2. Дабаўце ў табліцу «Туры» запісы (па адным):

INSERT INTO Туры
              VALUES (1, 'Австрия', 'автобус', 800);
INSERT INTO Туры
              VALUES (2, 'Норвегия', 'самолет', 1500);

Аналагічна дабаўце ў табліцу яшчэ некалькі запісаў:

Код

Страна

Транспорт

Цена

3

Швеция

паром

900 р.

4

Германия

автобус

700 р.

5

Греция

самолет

1200 р.

6

Норвегия

автобус

800 р.

7

Германия

самолет

1500 р.

 

3. Выканайце і захавайце запыты на выбарку даных з табліцы «Туры»:

1. Адлюструйце ўсе даныя табліцы:

SELECT * FROM Туры

Паглядзіце на вынік.

2. Для ўсіх запісаў адлюструйце толькі палі «Страна» і «Цена»:

SELECT Страна, Цена FROM Туры

3. Адлюструйце запісы, якія змяшчаюць даныя пра туры ў Нарвегію:

SELECT * FROM Туры WHERE Страна LIKE Норвегия

4. Складзіце, выканайце і захавайце запыты на выбар з табліцы «Туры»:

1. Значэнне палёў «Страна», «Транспорт» і «Цена» для ўсіх аўтобусных тураў.

2. Складзіце і выканайце запыт, які выбірае з табліцы «Туры» значэнні ўсіх палёў для тураў з цаной менш за 1000 р.

5. Праверце работу запыту:

SELECT * FROM Туры ORDER BY Цена

Дабаўце ў канцы папярэдняга запыту ключавое слова DESC. Што змянілася? Захавайце вынік.

6. Складзіце, выканайце і захавайце запыты на выбар з табліцы «Туры»:

1. Значэнні ўсіх палёў для тураў c коштам больш за 1000 р. і сартаваннем вынікаў па спаданні цаны.

2. Мінімальнай цаны для тураў у Нарвегію.

3. Тура з максімальнай цаной на самалёт.

7. Складзіце, выканайце і захавайце запыты для табліцы «Туры»:

1. Павелічэнне цаны ўсіх тураў на 10 %.

2. Рэалізацыя зніжкі на білеты так, што цэны ўсіх тураў на самалётах складаюць 80 % ад зыходных.

8. Скапіруйце табліцу «Туры», назваўшы копію «Туры2». Складзіце і выканайце запыт на выдаленне ўсіх тураў у Германію. Праверце, што даныя ў табліцы «Туры2» сапраўды змяніліся. Выдаліце табліцу «Туры2», якая больш не патрэбна, з дапамогай запыту.

9. Адкрыйце базу даных «Арэнда аўтамабіляў.accdb». Складзіце, выканайце і захавайце запыты.

  1. Выбраць усе аўтамабілі ў парадку года выпуску. Для тых, у якіх год выпуску аднолькавы — па спаданні кошту арэнды.
  2.  Знайсці аўтамабілі з аб’ёмам рухавіка >3.
  3. Знайсці аўтамабілі чырвонага колеру.
  4. Знайсці аўтамабілі з аб’ёмам рухавіка =2 і арэндай не больш за 300 р.
  5. Вывесці інфармацыю пра аўтамабілі, год выпуску якіх паміж 2000 і 2010.
  6. Вывесці ўсіх арандатараў, якія ужывуць на вуліцы Панамарова.
  7. Для кожнага аўтамабіля вызначыць кошт тэхагляду, які складае 70 % ад кошту арэнды.
  8. Выкарыстоўваючы групоўку, атрымаць выніковую суму арэнды для кожнай групы аўтамабіляў з аднолькавым відам паліва.
  9. Знайсці мінімальны, максімальны і сярэдні кошт арэнды для аўтамабіляў з аднолькавым тыпам кузава.

10. Выканайце запыт на пошук усіх узятых у арэнду аўтамабіляў.

SELECT *
FROM Автомобили
WHERE Код IN (SELECT ‘Автомобили_Код’ FROM Аренда);

11. Знайдзіце ўсіх арандатараў, якія не бралі ні адну машыну ў арэнду.