§ 6. Вымаўленне галосных і зычных гукаў, некаторых спалучэнняў зычных
Сайт: | Профильное обучение |
Курс: | Беларуская мова. 10 клас |
Книга: | § 6. Вымаўленне галосных і зычных гукаў, некаторых спалучэнняў зычных |
Напечатано:: | Гость |
Дата: | Понедельник, 29 Апрель 2024, 07:59 |
Правіла
Арфаэпічныя нормы вызначаюць узорнае вымаўленне галосных і зычных гукаў і іх спалучэнняў у літаратурнай мове. Асноўныя нормы вымаўлення галосных гукаў
|
Практыкаванне № 51
Прачытайце наступныя спалучэнні згодна з правіламі літаратурнага вымаўлення. Патлумачце гэтыя правілы.
З Італіі, Гродна і Віцебск, Віцебск і Мінск, прыгожае імя, пры іх, нехта іншы, кніга і аловак, ён ідзе, яна ідзе, у сям’і, ён і яна, мама ішла.
Практыкаванне № 52
Запішыце, устаўляючы прапушчаныя літары. Прачытайце словы ўголас. Якія правілы вымаўлення ілюструюцца падабранымі прыкладамі?
Ап..рэдзіць, ап..льсін, ап..ляцыя*, ап..кун, в..чэраць, в..чарэ´ць, в..чарына, вет..ран, вес..лейшы, в..с..луха, в..сёлка, г..раізм, г..ограф, дз..лавы, дз..вятка, дз..вочы, д..манстрацыя, зб..нтэжыцца, зв..ртацца.
Практыкаванне № 53
Прачытайце табліцу. З яе дапамогай раскажыце пра вымаўленне зычных, іх спалучэнняў у беларускай мове.
Практыкаванне № 54
Прачытайце. Зрабіце фанетычны запіс прапанаваных слоў.
Аб’інець, адказаць, барацьба, вераб’іны, выязджаць, грузчык, дакладчык, джынсы, дзвесце, дождж, жаніцьба, загадчык, збожжа, змешаны, ідзе, іскра, іхні, Навагрудчына, надвор’е, паснедаць, поспехі, просьба, разнесці, світаць, смелы, снег, спартзал, сшытак, сям’я, хаваешся, хвалюешся, цвёрды, чацвер, экзаменатар.
Назавіце агульнае і адрознае ў значэнні і паходжанні слоў арфаэпія і арфаграфія.
Выканайце інтэрактыўнае заданне па тэме «Асіміляцыя зычных гукаў».
Практыкаванне № 55
Прачытайце прыказкі. Выпішыце словы (спалучэнні слоў), у якіх вымаўленне не супадае з напісаннем. Карыстайцеся арфаэпічным слоўнікам беларускай мовы. Зрабіце фанетычны запіс слоў.
У з о р: не зловіш — [н’азло´в’іш].
1. Трэба розумам надтачыць, дзе сіла не возьме. 2. Ідучы па кладачцы, на бакі не глядзі. 3. Ідзі з людзьмі, то не згубішся. 4. Не смейся з людзей — смейся з сябе ці са сваіх дзяцей. 5. Не бойся звяглівага, а бойся куслівага. 6. Санлівага не дабудзішся, лянівага не дашлешся і не дажджэшся. 7. Пусці свінню пагрэцца, то і самому не будзе дзе дзецца. 8. Без хлеба яда — да парога хада.
Запішыце па памяці 4-5 прыказак, вусна растлумачце іх сэнс.
Практыкаванне № 56
Прачытайце. Сфармулюйце і сцісла запішыце асноўную думку кожнай часткі тэксту, а потым перакажыце яго.
Правільнае вымаўленне — істотны кампанент паняцця «культура вуснага маўлення». Існуюць адзіныя, абавязковыя для ўсіх носьбітаўф мовы нормы літаратурнага вымаўлення, якія, аднак, нярэдка парушаюцца па розных прычынах.
Першая з іх — захаванне ў вымаўленні дыялектных рыс роднай гаворкі. У мастацкіх творах пісьменнікі нярэдка абгрунтавана выкарыстоўваюць такія фанетычныя дыялектызмы для маўленчай характарыстыкі персанажаў. Напрыклад, у рамане І. Мележа «Людзі на балоце» чытаем: Ціхо ты, ціхо, Ганначко! Корч ездзіў у мясцечко па дохтара.
Другой прычынай парушэння арфаэпічных норм, на думку лінгвіста А. Падлужнага, «з’яўляецца двухмоўнаясл сітуацыя, пры якой адзін і той жа чалавек карыстаецца то рускай, то беларускай мовай. Пры слаба выпрацаваных навыках вымаўлення звычайна парушаюцца арфаэпічныя правілы як той, так і другой мовы».
Так, пад уплывам рускай мовы магчыма не зусім цвёрдае вымаўленне [ч] ([ч’алав’э´к], [ч’і´сты]), вымаўленне гука [в] на месцы [ў] ([наста´вн’ік],
[навра´], [пра´вда]), дж вымаўляецца як спалучэнне гукаў або як [ж] ([дажджы´], [джа´ла]), часам вымаўляецца паўмяккі [р’] ([р’аб’і´на], [ар’а´ц’]).
Трэцяя прычына памылак у вымаўленні — уплыў арфаграфіі. Іншы раз вымаўляюць словы так, як прывыклі іх пісаць: [адкус’і´ц’], [ву´чышс’а] замест [аткус’і´ц’], [ву´чыс’а] (Паводле І. Лепешава).
Растлумачце пастаноўку працяжніка ў сказах.
Падрыхтуйце вуснае выказванне на тэму «Чаму трэба захоўваць арфаэпічныя нормы?».
Практыкаванне № 57
Прачытайце. Сфармулюйце і запішыце асноўную думку тэксту. Раскажыце, якія арфаэпічныя нормы адлюстроўваюць выдзеленыя словы.
Не так даўно надта вядомы сталічны хлебны магазін атрымаў новае найменне. Цяпер ён мае назву «Каравай». Але не назва мяне зацікавіла, а падслуханы ля ка´сы дыялог.
— Мне «Старажытны», — кажа адзін.
— А мне «Траецкі», — просіць другі.
— А мне «Чабаровы», — гаворыць трэці.
А ёсць яшчэ хлеб «Беларускі», «Нарачанскі», «Раўбіцкі»... І гэтакі водар ідзе ад назваў! Слухаючы, як вымаўляюцца ля касы назвы розных гатункаў хлеба, падумаў: вось і нікога змушаць не трэба. У хлебнай краме ўсе гавораць па-беларуску. Само жыццё вымагае гэта рабіць.
Хай сабе хлебная крама «Каравай» яшчэ не моўны аазіс, але прыемна, што тут цэлы дзень, няспынна, ні на хвілінку не заціхаючы, гучаць родныя назвы. Хлеб і слова павінны быць побач. Абодва яны — вытокі нашага жыцця (Паводле У. Содаля).
Выпішыце з тэксту сінонімы. Карыстаючыся слоўнікам, запішыце сінанімічныя рады да слоў назва, гаварыць, родныя (словы), вытокі.
• Выпішыце складаны сказ, зрабіце яго сінтаксічны разбор.
Якія цікавыя беларускамоўныя назвы для новых гатункаў хлеба (цукерак, печыва) вы можаце прапанаваць?
Практыкаванне № 58
З дапамогай схем раскажыце правілы вымаўлення спалучэнняў зычных. Перадайце фанетычныя запісы слоў у адпаведнасці з арфаграфічнымі нормамі беларускай мовы.
Практыкаванне № 59
Прачытайце верш А. Пісьмянкова, прысвечаны малой радзіме. Ці кранае* ён чытача? Чым? Чаму менавіта такую будову твора абраў паэт? Чаму тэкст заканчваецца шматкроп’ем?
Бялынкавічы
Малюю —
Мілую
Радзіму малую:
Закутую* рэчку,
Лясное мястэчка.
Малюю старанна
Сярэбраны ранак,
Сасоннік, алешнік,
Рабіну, канешне ж,
З адвечнай самотай
На сінім сумёце*.
Вось дом
Пад бярозай,
Вось дым
На марозе,
Вось след
Каля брамы*:
МАМА...
Раскажыце аднакласнікам пра дарагія вашаму сэрцу мясціны.
Слухаючы і ацэньваючы расказы аднакласнікаў, звяртайце ўвагу як на змест, будову выступленняў, так і на адпаведнасць маўлення акцэнталагічным, арфаэпічным нормам, магчымыя іх парушэнні (напрыклад, парушэнне закону якання пры вымаўленні часціцы не і прыназоўніка без, парушэнні ў вымаўленні галос-
ных [у], [ і ], фрыкатыўнага [г] і выбухнога [ѓ], свісцячых зычных перад мяккімі і інш.).
Практыкаванне № 60
Прачытайце. З дапамогай тэксту пісьмова адкажыце на пытанне, заключанае ў назве. Якімі электроннымі перакладчыкамі вы карыстаецеся?
Якія плюсы і мінусы маюць электронныя перакладчыкі?
«Вясёлага эфіру!» — нібыта пажадаў карыстальнікам са сферы СМІ стваральнік «Белазара», электроннага перакладчыка з рускай мовы на беларускую. Прадбачым каментарыі некаторых журналістаў: «Эканоміць час, якога заўсёды нестае, і, здаецца, па-беларуску разумее няблага». Спрачацца не станем. Плюсоў шмат.
Вядома, аднак, што нават самымі дасканалымі* вынаходствамі трэба карыстацца з розумам. Гэта можна сказаць і ў адносінах да электронных перакладчыкаў. Яны, дарэчы, ствараліся не для навучання мове з нуля, а для дапамогі ў працы тым, хто валодае ёю на дастаткова высокім узроўні. А што атрымліваецца ў жыцці? Часам з-за нежадання гартаць кнігі электронны перакладчык становіцца найлепшым «сябрам» дылетантаў*. І ў выніку Папа Рымскі аказваецца Татам, а бялкі становяцца вавёркамі... Сэнс выказвання скажаецца, з’яўляюцца недарэчныя канструкцыі.
Увогуле, пры карыстанні электроннымі памочнікамі чалавек, давяраючы ім, губляе пільнасць і ўласны стыль. Таму прафесіяналы звычайна перакладаюць самастойна, каб узбагачаць, развіваць сваё моўнае майстэрства.
Электронныя перакладчыкі не заўсёды і не для ўсіх добрыя дарадцы. Таму, хто ведае мову, яны сапраўды эканомяць час. Асабліва калі патрэбна перакласці афіцыйную інфармацыю. Але машына... можа ўвесці ў зман. Не падыходзіць яна і для перакладу мастацкай літаратуры, таму што можа змяніцца сэнс, страціцца каларыт (В. Бандаровіч).
Зрабіце арфаэпічны разбор выдзеленых слоў: назавіце асаблівасці літаратурнага вымаўлення гукаў і спалучэнняў гукаў, праверце правільнасць вымаўлення і пастаноўкі націску па слоўніку. Адлюструйце асаблівасці вымаўлення праз фанетычны запіс (напрыклад: дождж — до[шч]).
Растлумачце, у чым заключаецца розніца паміж фанетычным і арфаэпічным разборамі слова.
• Назавіце сказы з пабочнымі словамі. Зрабіце сінтаксічны разбор аднаго з такіх сказаў.
Практыкаванне № 61
Прачытайце верш. Які настрой трэба перадаць пры яго чытанні? Паразважайце, у чым заключаецца пранікнёнасць і сіла паэтычнага слова. Зрабіце вусны арфаэпічны разбор выдзеленых слоў.
Я не ганю* землі чужыя, —
Хай іх сонца не абміне.
Толькі дзе б за морам ні жыў я,
Беларусь мая снілася мне.
Так карце´ла* — сляза закіпала,
Каб да сэрца хаця б здалёк
Прыплывалі жалейка Купалы,
Багдановічаў васілёк...
Гэта ўсё, безумоўна, не нова.
А ці трэба, каб новым было
Поле бацькава, матчына слова
І буслова над хатай жытло?
І якія б шляхі ні схадзіў я,
Кліча полацкая сенажаць...
А калі не спяваць аб Радзіме,
Дык навошта наогул спяваць?
Г. Бураўкін.
Растлумачце правапіс часціц не і ні ў тэксце. Узгадайце правілы напісання гэтых часціц з рознымі часцінамі мовы. Прывядзіце прыклады.