*§ 15—1. Небяспечныя для здароўя чалавека мікріскапічныя грыбы (мікраміцэты)

Прэамбула

Паводле марфалагічных прымет грыбы падзяляюцца на макраміцэты і мікраміцэты. Грыбы, у якіх пладовыя целы добра бачныя прстым вокам, атрымалі назву макраміцэты. Значная група грыбоў, што можна ўбачыць толькі з дапамогай павелічальных прыбораў, — гэта мікраміцэты.

У цяперашні час вядома каля 250 відаў таксічных для чалавека мікраміцэтаў. Яны выпрацоўваюць больш за 100 ядавітых рэчываў, якія з’яўляюцца небяспечнымі ў выпадку пападання ў прадукты харчавання чалавека і кармы сельскагаспадарчых жывёл. Шмат якія з гэтых рэчываў валодаюць кумулятыўным (накапляльным) дзеяннем і выклікаюць вельмі цяжкія наступствы.

Найбольш небяспечныя мікраміцэты

Сярод мікраскапічных грыбоў значную і найбольш небяспечную групу складаюць так званыя плесні. Напрыклад, аспергіл чорны, або чорная плесня, можа распаўсюджвацца як на сценах і столі кватэр, так і на харчовых прадуктах.

Пры ўдыханні спор аспергіла чорнага назіраецца моцны кашаль, боль у грудзі і заложанасць носа, дыхавіца, дыханне са свістам і хрыпамі. Цяжкімі формамі атручэння могуць стаць пнеўманія і бранхіяльная астма. Мікрачасціны грыба раздражняюць слізістыя абалонкі, у тым ліку і вочы, выклікаючы слёзацячэнне, кан’юктывіты, пачырваненні вачэй і пагаршэнне зроку. Пры пападанні на скурнае покрыва ўзнікаюць сверб, лушчэнне, пачырваненне, высыпанні, нярэдка развіваецца экзэма.

Грыбковыя споры кладаспорыя травянога (Cladospórium herbárum), пранікаючы ў органы дыхання, могуць стаць прычынай бранхіяльнай астмы і пнеўманіі. Пад уздзеяннем таксінаў грыба развіваюцца алергічныя рэакцыі: пачырваненне слізістай абалонкі носа, вока і кан’юнктывы; высыпанні на скуры, якія суправаджаюцца свербам, ацёкам; слязістасць; кашаль; чханне; цяжкае дыханне; бронхаспазма. У групе рызыкі развіцця алергіі на дадзены грыб знаходзяцца аслабленыя людзі з авітамінозам, якія маюць хранічныя паталогіі печані і нырак. Сімптомы атручэння найбольш небяспечнымі мікраміцэтамі пералічаны ў табліцы.

Табліца. Ядавітыя мікраміцэты, якія выклікаюць цяжкія атручэнні

Прафілактыка заражэння мікраміцэтамі

Каб пазбегнуць заражэння мікраміцэтамі, трэба выконваць шэраг правілаў. Неабходна рэгулярна прыбіраць жылое памяшканне з выкарыстаннем антысептычных і антымікозных сродкаў, не дапускаць сырасці і павышанай вільготнасці. Важна старанна аглядаць жыллё на прадмет наяўнасці грыбка. Асаблівую ўвагу неабходна надаваць ваннаму пакою з туалетам. У выпадку выяўлення плесні трэба неадкладна звярнуцца да спецыялістаў-міколагаў і прыняць усе магчымыя меры для яе выдалення.

Для прадухілення харчовых атручэнняў трэба:

1. Правяраць знешні выгляд прадуктаў харчавання і набываць толькі тую прадукцыю, на ўпакоўцы якой пазначаны час вырабу, тэрмін прыдатнасці, інфармацыя пра вытворцу, склад, даныя пра сертыфікацыю вырабу.
2. Трымаць у чысціні халадзільнік і своечасова прыбіраць з яго сапсаваныя прадукты.
3. Не выкарыстоўваць некалькі разоў пакеты, у якіх раней захоўваліся хлебныя вырабы, крупы, арэхі, сухафрукты. Арэхі і сухафрукты павінны захоўвацца ў халаднаватым, цёмным і сухім месцы.
4. Пашкоджаныя плесняй прадукты харчавання трэба выкідваць разам з упакоўкай.
5. Пажадана не рабіць доўгачасовыя прадуктовыя запасы, а набываць прадукты па меры неабходнасці.

Першая дапамога пры атручэнні мікатаксінамі

Як і ў выпадку любога іншага атручэння, рэкамендуецца піць больш чыстай цёплай вады для актывізацыі вывядзення таксінаў ныркамі, а таксама пры любым, нават самым малаважным атручэнні, важна своечасова звярнуцца да ўрача.

Праверым веды