§ 28. Расійская Федэрацыя

5. Знешнепалітычныя выклікі

Пасля распаду СССР Расія скараціла свой ядзерны патэнцыял. Але яна па-ранейшаму валодае другім у свеце па аб’ёме ваенным і ядзерным арсеналам, што дазваляе ёй захоўваць статус і ўплыў сусветнай дзяржавы. ЗША, яе стары сапернік, спадзяваліся, што Расія будзе дапамагаць ім у вырашэнні разнастайных сусветных праблем. Аднак гэтага, па вялікім рахунку, так і не адбылося. ЗША і многія іншыя краіны Захаду занепакоены імкненнем рускіх аднавіць былую моц Расійскай дзяржавы. У сваю чаргу Расія з непакоем назірае за прасоўваннем НАТА на Усход, бачачы ў ім пагрозу сваёй нацыянальнай бяспецы.