§ 9-1. Біялагічна актыўныя рэчывы: вітаміны, алкалоіды, антыбіётыкі

Якасная рэакцыя на аскарбінавую кіслату (вітамін С)

Заданне рэкамендуецца выконваць у школе. Будзьце асцярожныя пры рабоце з рэактывамі, выконвайце правілы тэхнікі бяспекі!

Аскарбінавая кіслата лёгка акісляецца. Прадукт яе акіслення — дэгідрааскарбінавая кіслата, далучаючы два атамы вадароду, зноў аднаўляецца да аскарбінавай кіслаты.

Якасная рэакцыя на вітамін С заснавана на тым, што ён пры акісленні, аднаўляе гексацыянаферат (III) калію K₃[Fe(CN)₆], вядомы пад назвай «чырвоная крывяная соль», да гексацыянаферату (II) калію — K₄[Fe(CN)₆]. Апошні, узаемадзейнічаючы з іонам Fe³⁺, утварае гексацыянаферат (II) жалеза — берлінскі лазурак Fe₄[Fe(CN)₆]₃.

Падрыхтуйце ўзоры для даследавання. Гэта могуць быць розныя фруктовыя сокі (яблычны, апельсінавы, грэйпфрутавы, лімонны і інш.), сокі, атрыманыя з капусты, бульбы ці іншай агародніны, выцяжка з пладоў шыпшыны і г. д.
Перад аналізам развядзіце сокі вадой.
Таксама ў якасці ўзораў падрыхтуйце пітную ці дыстыляваную ваду і раствор аскарбінавай кіслаты (яе можна набыць у аптэцы).
Да ўзораў, якія даследуюцца, прыліце крыху раствору чырвонай крывяной солі.
Перамяшайце змесціва, а потым дабаўце да кожнага ўзору некалькі кропель раствору FeCl₃. У растворах, што змяшчаюць вітамін С, развіваецца сіне-зялёнае афарбоўванне з наступным выпадзеннем сіняга (ці сіне-зялёнага) асадку берлінскага лазурку.

● У якіх даследаваных вамі ўзорах была выяўлена аскарбінавая кіслата?

● Як вы думаеце, на чым заснаваны ўдзел вітаміну С у акісляльна-аднаўленчых працэсах у арганізме?